«Արսենալի» հարձակվող Ալեքսանդր Լակազետն այս ամառ ազատ գործակալի կարգավիճակով, ամենայն հավանականությամբ, կհեռանա լոնդոնյան ակումբից։
Նրա ծառայություններով, ինչպես Թվիթերում տեղեկացրել է իտալացի լրագրող Նիկոլո Սկիրան, հետաքրքրված են «Ինտերը» և «Յուվենտուսը», որոնք դիտարկում են հարձակվողի հետ պայմանագիր կնքելու հնարավորությունը։ 30-ամյա Լակազետին ցանկանում է վերադարձնել նաև «Լիոնը», որի կազմում Ֆրանսիայի հավաքականի հարձակվողը հանդես է եկել 2010-17 թվականներին։
«Արսենալի» հետ Լակազետի պայմանագրի ժամկետը լրանում է այս ամառ։ Նա անգլիական թիմում է արդեն 5 տարի։ Transfermarkt մասնագիտացված կայքը 20 մլն եվրո է գնահատում ֆուտբոլիստի շուկայական արժեքը։
Անգլիայի Պրեմիեր լիգայի ընթացիկ մրցաշրջանում Լակազետը մասնակցել է 18 խաղի, դարձել 3 գոլի և 5 արդյունավետ փոխանցման հեղինակ։