Քարից փխրուն ու հանցավոր
Իտալացի քանդակագործ Ֆաբիո Վիալեի անհավատալի քանդակների մասին լսել է ամբողջ աշխարհը: Տաղանդավոր արտիստի ստեղծագործություններին նայելիս` առաջին հայացքից դժվար է հասկանալ, թե քանդակներն ի վերջո ինչից են պատրաստված: Վիալեն ստեղծում է հնարավոր ու անհնար ամեն ինչ հենց մարմարից: Քանդակագործի դաջվածքներով շարքը կոտրում է բոլոր կարծրատիպերը ավանդական քանդակագործության մասին, ընդգծելով արտիստի յուրօրինակ ընկալումները հելլենիզմի ժամանակաշրջանից մինչև մեր օրեր:
Կարդացեք նաև՝ Հունական դիցաբանություն. Պիգմալիոն՝ մարդ, որ սիրահարվեց իր ստեղծած արձանին
Ֆաբիո Վիալեն ծնվել է 1975 թվականին իտալական Կունեո քաղաքում: Փոքր տարիքից նա սիրահարվել է ձյունաճերմակ քարի այս տեսակին, իսկ 16 տարեկանից արդեն սկսել աշխատել դրա հետ: Օգտագործելով հայտնի քանդակների մարմինները` ինչպիսին հելլենիստական դարաշրջանի ամենահայտնի ստեղծագործություններից «Միլոսյան Վեներա» քանդակը, նկարիչը զարդարում է իրատեսական դաջվածքներով, ոգեշնչվելով տարբեր ռուսական խմբավորումներից և ճապոնական Յակուձայից: