Բրազիլիայի ֆուտբոլի կոնֆեդերացիան(CBF) դիմել է ՖԻՖԱ-ին՝ խնդրելով, որ Պրեմիեր լիգայի մի քանի ակումբների արգելվի առաջիկա 5 օրերին խաղադաշտ դուրս բերել Բրազիլիայի հավաքականի անդամ խաղացողներին՝ հաղորդում են բրիտանական լրատվամիջոցները:
Եթե ակումբները չկատարեն արգելքի պահանջները, նրանց կգրանցվի տեխնիկական պարտություն, ինչպես նաև կենթարկվեն ֆինանսական պատժամիջոցի: Ֆուտբոլիստները նույնպես կարող են պատժվել:
Բրազիլիայի ֆուտբոլի կոնֆեդերացիայի քայլը պայմանավորված է նրանով, որ անգլիական մի քանի ակումբներ միահամուռ կերպով արգելել էին իրենց կազմում ելույթ ունեցող ֆուտբոլիստներին միանալ այն հավաքականներին, որոնք ներառված են «կարմիր» ցուցակի երկրներում, քանի որ ֆուտբոլիստները հավաքականներից վերադառնալուց հետո պետք է տասնօրյա կարանտին անցնեին:
Արգելքը կտարածվի Պրեմիեր լիգայի այնպիսի ակումբների վրա, ինչպիսիք են «Լիվերպուլը», «Մանչեսթեր Սիթին», «Մանչեսթեր Յունայթեդը», «Չելսին»: ՖԻՖԱ-ն որոշման մասին արդեն տեղեկացրել է ակումբներին:
Այսպիսով՝ առաջիկա 5 օրերին Պրեմիեր լիգայի խաղերին չեն կարող մասնակցել Ֆաբինյոն, Ալիսոնը, Ֆիրմինոն(բոլորը՝ «Լիվերպուլ»), Տիագո Սիլվան(«Չելսի»), Ֆրեդը(«Մանչեսթեր Յունայթեդ»), Գաբրիել Ժեզուշը, Էդերսոնը(երկուսն էլ՝ «Մանչեսթեր Սիթի») և Ռաֆինյան(«Լիդս»):
Հատկանշական է, որ Բրազիլիայի ֆուտբոլի կոնֆեդերացիան «Էվերթոնում» հանդես եկող Ռիչարլիսոնի վերաբերյալ չի դիմել ՖԻՖԱ-ին: Ըստ երևույթին՝ պատճառն այն է, որ թիմը նրան թույլատրել էր մասնակցել ՏՈԿԻՈ 2020-ին, թեպետ պարտավոր չէր:
Ի՞ՆՉ Է ՀՆԳՕՐՅԱ ԿԱՆՈՆԸ
Հնգօրյա կանոնն ստեղծվել է ՖԻՖԱ-ի կողմից՝ ազգային հավաքականներին ակումբների՝ անհարկի ու չհիմնավորված պատճառներով ֆուտբոլիստներին հավաքականներից ետ կանչելուց պաշտպանելու համար:
Համաձայն ՖԻՖԱ-ի կանոնների՝ այն խաղացողները, որոնք հավաքականի կազմում հայտավորվել են հանդիպումների, կարող են ազատվել իրենց ակումբներում ելույթ ունենալուց հավաքականների կազմում խաղերով պայմանավորված միջազգային դադարից հետո 5 օր ժամկետով:
Նշված դեպքում ժամանակահատվածը ներառում է սեպտեմբերի 10-14-ը: