Սլովենիայի Բրեժիցե քաղաքում ընթացող շախմատի Եվրոպայի տղամարդկանց անհատական առաջնությունը մոտենում է ավարտին: Այսօր կայացած նախավերջին՝ 10-րդ տուրում Գաբրիել Սարգսյանը սպիտակներով 27-րդ քայլին անչափ կարևոր հաղթանակ տոնեց ադրբեջանցի Աբդուլա Գադիմբայլիի նկատմամբ և 8 միավորով Մաթիաս Բլուեբաումի հետ գլխավորեց մրցաշարային աղյուսակը:
7-ական միավորով առաջատարներին հետապնդողների թվում են նաև Սամվել Տեր-Սահակյանն ու Հայկ Մարտիրոսյանը, որոնք հաշտություն կնքեցին համապատասխանաբար Միսրադին Իսկանդարովի և Ժյուլ Մուսարդի հետ:
Բացի Գաբրիելից, 10-րդ տուրում հաղթանակներ տոնեցին նաև Շանթ Սարգսյանն ու Էմին Օհանյանը՝ պարտության մատնելով համապատասխանաբար Գրժեգորժ Նասուտային և Բոգդան Լոզինսկուն: Շանթը վաստակել է 6,5 միավոր: Նույնպիսի արդյունք ունի նաև Մանուել Պետրոսյանը, որը հաշտություն կնքեց Էմրե Կանի հետ:
Ոչ-ոքի ավարտեց պարտիան նաև Ռոբերտ Հովհաննիսյանը, որի մրցակիցը Միգել Օրտեգան էր: Արթուր Դավթյանն ու Մամիկոն Ղարիբյանը պարտվեցին:
