«ԳԱՆՁԱՍԱՐ ԿԱՊԱՆ» – «ՇԻՐԱԿ»
2 խաղ, +0=1-1, 2:4
12 ապրիլի, ժ.16:00, «Հանրապետական» մարզադաշտ
2005թ., 1/8 եզրափակիչ
14.03 «Գանձասար» – «Շիրակ»՝ 2:2 (2:1)
Արմեն Կոստանդյան (37), Վիլեն Հարությունյան (40) – Երվանդ Հակոբյան (5), Վարդան Բիչախչյան (48):
19.03 «Շիրակ» – «Գանձասար»` 2:0 (1:0)
Արման Տոնոյան (24), Կարեն Խաչատրյան (54):
Որքան էլ որ զարմանալի է, սակայն ՀՀ գավաթի խաղարկություններում «Շիրակն» ու «Գանձասար Կապանն» առայժմ միայն մեկ անգամ են մրցակիցներ եղել: Գավաթային այդ միակ դիմակայությունը կայացել է 2005թ. խաղարկության 1/8 եզրափակչում:
Այն ժամանակ ընդամենը մեկամյա կենսագրություն ունեցող նորաստեղծ «Գանձասարն» Արմեն Ստեփանյանի գլխավորությամբ հանդես էր գալիս ՀՀ առաջնության առաջին խմբում: Եվ հենց «Շիրակի» հետ խաղում էլ գանձասարցիները նշեցին նորամուտը Հայաստանի գավաթի խաղարկություններում:
Հետաքրքիր է, որ Կապանում կայացած մրցակիցների առաջին խաղում շիրակցիներին պարտությունից փրկել է թիմի ներկայիս գլխավոր մարզիչ Վարդան Բիչախչյանը: Նա այդ հանդիպման մասնակիցներից միակն է, ով ներկայումս «Շիրակում» է:
Իսկ ընդհանրապես գավաթային այդ դիմակայությանը մասնակցած ֆուտբոլիստներից այսօր ելույթները շարունակում է միայն գյումրեցի Հրայր Մկոյանը:
Նշենք նաև, որ պատասխան հանդիպումը, որում «Շիրակը» Ժորա Բարսեղյանի գլխավորությամբ հաղթեց ու քառորդ եզրափակչի ուղեգիր նվաճեց, կայացել է Արմավիրում:
Առաջիկա հանդիպումը գանձասարցիների ավագ Արա Խաչատրյանի համար կլինի 23-րդը թիմի կազմում գավաթի մրցաշարերում: Այդ ցուցանիշով նա կհավասարվի գավաթի խաղարկություններում «Գանձասր Կապանում» անցկացրած խաղերի քանակով ռեկորդակիր Արմեն Տատինցյանին, ով ի դեպ մասնակցել է «Շիրակի» հետ կայացած գավաթային դիմակայությանը:
Երկու թիմերն էլ առանձնակի հաջողությունների չեն հասել գավաթի մրցաշարում: Գավաթի խաղարկությունների անփոփոխ մասնակից շիրակցիները 6 անգամ հանդես գալով եզրափակչում, միայն մեկ անգամ՝ 2012թ. հինգերորդ փորձից են նվաճել պատվավոր մրցանակը՝ վճռորոշ խաղում 1:0 հաշվով առավելության հասնելով «Իմպուլսի» նկատմամբ:
«Գանձասար Կապանի» ամենամեծ հաջողությունն առայժմ 2013/14թթ. գավաթի եզրափակչին մասնակցելն է, որտեղ կապանցիները 1:2 հաշվով զիջել են «Փյունիկին»:
Հարկ է նշել, որ գավաթի նախորդ երեք խաղարկություններում «Շիրակին» չի հաջողվել հաղթահարել առաջին փուլի՝ քառորդ եզրափակչի արգելքը: Պատվավոր մրցանակի ընթացիկ խաղարկությունում «Շիրակն» Աբովյանում քառորդ եզրափակչի առաջին խաղը նորաստեղծ «Կոտայքի» հետ ավարտեց գոլազուրկ ոչ-ոքի: Իսկ մրցակիցների պատասխան հանդիպումը չկայացավ, քանի որ «Կոտայքը» լուծարվել էր:
Իսկ գանձասարցիները կիսաեզրափակչի ուղեգիր նվաճեցին առանց խաղի, քանի որ մրցակիցը՝ առաջին խմբում հանդես եկող «Էրեբունին» հրաժարվեց գավաթի մրցաշարի մասնակցությունից: Ընդ որում «Էրեբունին» մեկնել էր Կապան՝ անցյալ տարվա սեպտեմբերի 21-ին կայանալիք գավաթային առաջին հանդիպմանը:
Սակայն խաղը հետաձգվել էր, քանի որ հանդիպման մրցավարական բրիգադը Կապան մեկնելիս Գորիսի ճանապարհին ավտովթարի էր ենթարկվել: Իսկ երբ ՀՖՖ-ն այդ հանդիպման նոր ժամկետ նշանակեց, «Էրեբունին» հրաժարվեց գավաթի մրցաշարից՝ պատճառաբանելով, որ թիմի երիտասարդ ֆուտբոլիստներին դժվար է կրկին Կապան մեկնելը:
Հոգեբանական առումով այս խաղում որոշակի առավելությունը գանձասարցիների կողմն է, որոնք գերազանց են սկսել առաջնության գարնանային հատվածը և տոնած 5 անընդմեջ հաղթանակների շնորհիվ գլխավորում են մրցաշարային աղյուսակը:
Իսկ ահա «Շիրակը» գարնանը կորցրեց մրցակիցների նկատմամբ ունեցած առավելությունը և այժմ հայտնվել է առաջատարներին հետապնդողի դերում: Գյումրեցիների խաղում որոշակի անկում է նկատվում: Նախորդ տուրում «Շիրակին» մեծ դժվարությամբ հաջողվեց ընդհատել 3 անընդմեջ պարտությունների շարքն ու խաղավերջում խփած միակ գոլի շնորհիվ հաղթել «Բանանցին»:
Ընթացիկ առաջնությունում մրցակիցների մրցավեճում առայժմ հավասարակշռություն է պահպանվում: Առաջին երկու հանդիպումներում հաջողությունն ուղեկցել է շիրակցիներին միևնույն 1:0 հաշվով, իսկ 3-րդ և 4-րդ շրջաններում գանձասարցիները ռևանշի են հասել (1:0, 2:1):
Աշոտ Հայրապետյան