ԲԿՄԱ-ի հետ խաղում դուբլ ձևակերպելով, Գեղամ Հարությունյանը ոչ միայն իր թիմին անդրանիկ հաղթանակը պարգևեց ընթացիկ առաջնությունում, այլև դարձավ VBET ՀՊԼ-ում «Նոայի» կազմում գոլ խփած ամենատարեց ֆուտբոլիստը: Գեղամը «Նոայում» գոլերի հաշիվը բացեց թիմում անցկացրած իր 7-րդ խաղում՝ աչքի ընկնելով 30 տարեկան 355 օրականում: Նա «Նոայում» նորամուտը նշել էր մարտի 4-ին Վանաձորում «Լոռիի» հետ կայացած առաջնության խաղում:
Գեղամ Հարությունյանը գերազանցեց թիմի նախկին ֆուտբոլիստ Դմիտրի Կլիմակովի ռեկորդային ցուցանիշը, որը գոլի հեղինակ էր դարձել 29 տարեկան 363 օրականում: «Նոայի» ներկայիս կազմի ֆուտբոլիստներից Հարությունյանի արդյունքը կարող են բարելավել 34-ամյա Դենիս Դեդեչկոն և ԲԿՄԱ-ի հետ խաղում թիմում նորամուտը նշած 33-ամյա Ալեքսանդր Կարապետյանը, որոնք դեռ գոլի հեղինակ չեն դարձել:
Դուբլի շնորհիվ Գեղամ Հարությունյանը VBET ՀՊԼ-ում խփած գոլերի քանակը հասցրեց 55-ի: Այդ ցուցանիշով Գեղամն ընթացիկ առաջնության մասնակիցներից ամենաարդյունավետն է: Նա ՀՀ առաջնությունների 100 լավագույն ռմբարկուների ցանկում Վարդան Բիչախչյանի, Հենրիկ Բերբերյանի և Արսեն Բալաբեկյանի հետ բաժանում է 40-43-րդ տեղերը:
Բարձրագույն խմբում իր առաջին երկու գոլերը Հարությունյանը խփել է «Ուլիսում»: Երկար տարիներ հանդես գալով «Գանձասար-Կապանում», փորձառու ֆուտբոլիստը 51 գնդակով թիմի բոլոր տարիների լավագույն ռմբարկուն է:
VNews.am-ը ներկայացնում է VBET ՀՊԼ-ում «Նոայում» գոլի հեղինակ դարձած ամենատարեց ֆուտբոլիստների տասնյակը:
| Ֆուտբոլիստներ | Տարիքը | Ամսաթիվն ու մրցակիցը |
| 1. Գեղամ Հարությունյան | 30 տ. 355 օր. | 13.08.2021 ԲԿՄԱ՝ 2-1 |
| 2. Դմիտրի Կլիմակով | 29 տ. 363 օր. | 03.03.2019 «Բանանց»՝ 1-1 |
| 3. Վլադիսլավ Կրյուչկով | 29 տ. 350 օր. | 09.08.2019 «Երևան»՝ 2-0 |
| 4. Պավել Դեոբալդ | 29 տ. 256 օր. | 07.03.2020 «Փյունիկ»՝ 4-2 |
| 5. Դավիթ Մանոյան | 29 տ. 55 օր. | 29.08.2019 «Ուրարտու»՝ 2-0 |
| 6. Բենիկ Հովհաննիսյան | 28 տ. 10 օր. | 11.05.2021 «Շիրակ»՝ 3-0 |
| 7. Պավել Կիրիենկո | 27տ. 49օր. | 2.08.2021 «Արարատ»՝ 1-7 |
| 8. Վլադիմիր Ազարով | 27 տ. 21 օր. | 09.04.2021 «Փյունիկ»՝ 1-0 |
| 9. Արգիշտի Պետրոսյան | 26 տ. 210 օր. | 14.05.2019 «Գանձասար-Կապան»՝ 1-0 |
| 10. Դանու Սպատարու | 26 տ. 159 օր. | 30.10.2020 «Շիրակ»՝ 3-0 |
