Ինչպես հայտնի է, ավարտվել է Հայաստանի գավաթի 2016/17թթ. խաղարկության կիսաեզրափակիչ փուլը: Կայացած պատասխան հանդիպումներից հետո պայքարից դուրս են մնացել «Բանանցը» և «Գանձասար-Կապանը», իսկ գավաթակրի կոչումը մայիսի 10-ին կվիճարկեն «Շիրակը» և «Փյունիկը»:
Ձեր ուշադրությանն ենք ներկայացնում 10 փաստ, որոնք առանձնացել են գավաթային պատասխան մրցավեճերից:
1. Ֆուտբոլի Հայաստանի գավաթի կիսաեզրափակչի պատասխան երկու հանդիպումներից մեկն ավարտվեց ոչ-ոքի, մյուսում հաղթեցին հյուրերը: Առաջին հանդիպումներում պարտված թիմերին այդպես էլ չհաջողվեց ռևանշի հասնել: Գավաթի մրցաշարում առայժմ ավելի հաջող են հանդես եկել հյուրերը, որոնք կայացած 9 հանդիպումներից շահել են 5-ը, պարտվել են 2-ում, նույնքան խաղ էլ ավարտել են ոչ-ոքի: Գրանցված 15 գոլերից 9-ի հեղինակը հյուրընկալվելիս հանդես եկած ֆուտբոլիստներն են:
2. Հայաստանի 8-ակի գավաթակիր «Փյունիկը» 19-րդ անգամ հանդես գալով պատվավոր մրցանակի խաղարկության կիսաեզրափակչում, 12-րդ անգամ հաղթահարեց այդ փուլի արգելքն ու եզրափակչի ուղեգիր նվաճեց: Վերջին անգամ փյունիկցիները գավաթի եզրափակչում հանդես են եկել 2015թ.: Այդ տարի «Փյունիկը» Սարգիս Հովսեփյանի գլխավորությամբ գավաթի վճռորոշ խաղում 3:1 հաշվով պարտության մատնեց «Միկային»:
3. «Բանանցի» հետ անցկացրած գավաթային 12 հանդիպումներում «Փյունիկը» 7-րդ հաղթանակը տոնեց: Մրցակիցների միջև կայացած գավաթային վերջին 4 հանդիպումներն էլ շահել է «Փյունիկը»: «Փյունիկը» գավաթի ընթացիկ խաղարկությունում միակն է, որ հաղթել է անցկացրած 4 հանդիպումներում էլ:
4. «Բանանցը» վայր դրեց գավաթակրի լիազորությունները: Թիմը 16-րդ անգամ հանդես եկավ գավաթի կիսաեզրափակչում և 8-րդ անգամ չկարողացավ հաղթահարել այդ փուլի արգելքը: Վերջին անգամ «Բանանցը» կիսաեզրափակչում անհաջողության էր մատնվել 2015թ.՝ երկու խաղերի ընդհանուր արդյունքով զիջելով «Միկային» (2:1, 1:3): Գավաթի ընթացիկ խաղարկությունում «Բանանցը» 3-րդ անընդմեջ պարտությունը կրեց:
5. Գավաթի մրցաշարերում «Փյունիկի» և «Բանանցի» ճանապարհները 8-րդ անգամ հատվեցին: «Բանանցին» հաջողությունն ուղեկցել է ընդամենը 2 անգամ՝ 1992թ. եզրափակչում (2:0) և 2003թ. կիսաեզրափակչում (1:1, 2:1): Պատվավոր մրցանակի խաղարկության կիսաեզրափակչում «Փյունիկն» ու «Բանանցը» 3-րդ անգամ մրցեցին: «Փյունիկն» այդ փուլում երկրորդ անգամ հաղթահարեց «Բանանցի» դիմադրությունն ու եզրափակչի ուղեգիր նվաճեց: Առաջին անգամ դա փյունիկցիներին հաջողվել էր 2006թ. ի հաշիվ մրցակցի դաշտում խփած գոլի (1:0, 1:2):
6. «Շիրակը» 13-րդ անգամ հանդես գալով պատվավոր մրցանակի խաղարկության կիսաեզրափակչում, 7-րդ անգամ հաղթահարեց այդ փուլի արգելքն ու եզրափակչի ուղեգիր նվաճեց: Վերջին անգամ շիրակցիները գավաթի եզրափակչում հանդես են եկել 2013թ.՝ 0:1 հաշվով զիջելով «Փյունիկին»: Առայժմ գյումրեցիներին միայն մեկ անգամ է հաջողվել նվաճել ՀՀ գավաթը: 2012թ. «Շիրակը» գավաթի վճռորոշ խաղում Վարդան Բիչախչյանի գլխավորությամբ Լամին Լի Յորոյի խփած միակ գոլի շնորհիվ հաղթել է «Իմպուլսին»: Վարդան Բիչախչյանի օրոք «Շիրակը» 3-րդ անգամ կվիճարկի Հայաստանի գավաթը:
7. Գավաթի մրցաշարերում «Շիրակն» ու «Գանձասար Կապանը» երկրորդ անգամ էին զույգեր կազմել: Այս անգամ էլ գավաթային դիմակայությունում հաջողությունն ուղեկցեց գյումրեցիներին: 2005թ. կայացած մրցավեճում շիրակցիները մրցակցի նկատմամբ առավելության էին հասել 1/8 եզրափակչում (2:2, 2:0):
8. Եզրափակչի ուղեգիր նվաճելու «Գանձասար Կապանի» 4-րդ փորձն անհաջողության մատնվեց: Առայժմ միայն մեկ անգամ է գանձասարցիներին հաջողվել վիճարկել գավաթը: 2014թ. կապանցիները գավաթի վճռորոշ խաղում 1:2 հաշվով պարտվել էին «Փյունիկին»:
9. Արամ Շահնազարյանը բացեց գոլերի հաշիվը գավաթի մրցաշարում՝ գրավելով իր նախկին թիմի՝ «Բանանցի» դարպասը: Իսկ «Բանանցի» կազմում գավաթի մրցաշարում նորամուտը նշած Մարտին Գրիգորյանն ընդգրկվեց գավաթի խաղարկություններում թիմում հանդես եկած ամենաերիտասարդ ֆուտբոլիստների տասնյակում: Խաղի օրը նա 16 տարեկան 212 օրական էր:
10. Գավաթի ընթացիկ խաղարկությունում գրանցվեց երկրորդ ինքնագոլը, որի հեղինակը գանձասարցի Վասպուրակ Մինասյանն է: Մինչ այդ գավաթի կիսաեզրափակչի առաջին խաղում սեփական դարպասը գրավել էր «Բանանցի» ֆուտբոլիստ Արամ Բարեղամյանը:
Աշոտ Հայրապետյան