Ֆրանսիայի հավաքականի հարձակվող Անտուան Գրիզմանը խոսել է Մադրիդի «Ատլետիկո» իր վերադարձի մասին:
«Ես շատ երջանիկ եմ: 10 օր չեմ քնել՝ սպասելով այն պահին, որն այժմ վայելում եմ ընտանիքիս հետ: Յուրաքանչյուր հանդիպման ես կանեմ հնարավորը, որ վերադարձնեմ այն ջանքերը, որ ակումբն է գործադրել՝ ինձ թիմ բերելու համար:
Ես ցանկանում էի վերադառնալ, քանի որ գիտեի, որ «Ատլետիկոն» ինձ համար լավագույն վայրն է, որտեղ ես երջանիկ եմ ինչպես խաղադաշտում, այնպես էլ դրա սահմաններից դուրս:
Տրանսֆերային պատուհանի վերջին օրը փոքր-ինչ խելահեղ էր, բայց ամեն ինչ լավ անցավ»,- Marca-ն մեջբերում է Գրիզմանի խոսքը:
Գրիզմանը «Բարսելոնայից» «Ատլետիկո» է տեղափոխվել ամառային տրանսֆերային պատուհանի վերջին օրը: Պայմանագիրը վարձակալական հիմունքով է՝ հիմնական դառնալու հնարավորությամբ:
30-ամյա ֆրանսիացին մադրիդյան ակումբում ելույթ է ունեցել նաև 2014-2019 թվականներին:
