Մեկնարկում է VBET Հայաստանի Պրեմիեր լիգայի 4-րդ տուրը:
«Ուրարտու» – «Ալաշկերտ» հանդիպումը հետաձգվել է, քանի որ օգոստոսի 19-ին Հայաստանի չեմպիոնը Եվրոպա լիգայի փլեյ-օֆֆ փուլում հյուրընկալվելու է շոտլանդական «Գլազգո Ռեյնջերսին»:
Ձեր ուշադրությանն ենք ներկայացնում տուրի մյուս 4 մրցավեճերին վերաբերող ամենահետաքրքիր ու ամենաուշագրավ փաստերը:
«ՍԵՎԱՆ» – «ԱՐԱՐԱՏ»
19 օգոստոսի, ժ.17:00, Երևան, «Նաիրի» մարզադաշտ
VBET ՀՊԼ-ում մրցակիցներն առաջին անգամ են հանդիպելու
«Սևան»՝ 4-րդ տեղ (6 միավոր), «Արարատ»՝ 1-ին տեղ (9 միավոր):
Հետաքրքիր 5 փաստ՝ հանդիպմանն ընդառաջ
1. Առաջնության նախորդ տուրը հաջող էր «Սևանի» համար, որը նոր գլխավոր մարզիչ Պամբոս Քրիստոդուլուի գլխավորությամբ խաղավերջում Անդրե Մենսալաոյի խփած միակ գոլի շնորհիվ հաղթեց «Նորավանքին»:
2․ «Արարատը» գերազանց է սկսել հոբելյանական առաջնությունը՝ իր պատմության մեջ 5-րդ անգամ մեկնարկում 3 անընդմեջ հաղթանակ տոնելով: Վերջին անգամ դա արարատցիներին հաջողվել էր 2019/20թթ. Սերգեյ Բոյկոյի օրոք: Իսկ առավել հաջողված մեկնարկը 2008թ. առաջնությունում էր, երբ Վարուժան Սուքիասյանի գլխավորությամբ արարատցիները 7 անընդմեջ հաղթանակ էին տոնել:
3․ Մրցակիցների միջև պաշտոնական առաջին հանդիպումը կայացել է VBET Հայաստանի գավաթի նախորդ խաղարկության 1/8 եզրափակչում: Անցյալ տարվա սեպտեմբերի 19-ին կայացած գավաթային առաջին խաղում «Արարատը» սեփական հարկի տակ 3-0 հաշվով հաղթել էր Առաջին խմբի ներկայացուցչին: Արարատցիներից դուբլի հեղինակ էր դարձել Մորի Կոնեն, մեկ գոլ էլ խփել էր Դավիթ Խուրցիձեն:
Նոյեմբերի 7-ին կայացած պատասխան խաղում էլ արարատցիները կրկին հաղթել էին, այս անգամ՝ 3-1 հաշվով: Մորի Կոնեն դարձյալ դուբլի հեղինակ էր դարձել, մեկ անգամ էլ աչքի էր ընկել Էդգար Մալաքյանը: «Սևանից» միակ գոլը խփել էր Մհեր Սահակյանը՝ գրավելով Սպասոյե Ստեֆանովիչի պաշտպանած դարպասը:
4․ «Արարատի» 35-ամյա ավագ Հրայր Մկոյանը կլինի հանդիպման մասնակիցներից ամենատարեցն ու ամենափորձառուն: Հայկական 7 թիմերի կազմերում նա Բարձրագույն խմբում ընդհանուր առմամբ 273 խաղ է անցկացրել, որից 68-ն՝ «Արարատում»:
5․ Այս խաղում հետաքրիքր կլինի հետևել 4-ական գոլով առաջնության լավագույն ռմբարկուների ցանկը գլխավորող արարատցի Դոնիմանի Յակուբա Սիլուեի և «Սևանի» հարձակվող Անդրե Մենսալաոյի դիմակայությանը: Հետաքրքիր է, որ նրանք ընթացիկ առաջնությունում առայժմ միևնույն գրաֆիկով են գոլեր խփել: Երկուսն էլ մեկնարկային տուրում հեթ-տրիկի հեղինակ են դարձել, իսկ 3-րդ տուրում մեկական գոլ են խփել:
