Ալբանիայում ավարտված ծանրամարտի Եվրոպայի առաջնության մեդալային հաշվարկում Հայաստանի տղամարդկանց հավաքականը գրավել է 2-րդ տեղը՝ իրենից առաջ թողնելով միայն Բուլղարիայի ընտրանուն։
Մեր երկրի հաշվին գրանցվել է ընդհանուր 18, իսկ Բուլղարիայի՝ 22 մեդալ։ Հայ ծանրորդներն առանձին վարժություններում և երկամարտում նվաճել են 4 ոսկե, 9 արծաթե և 5 բրոնզե մեդալ։
Եվրոպայի չեմպիոն են դարձել Ռաֆիկ Հարությունյանը (81 կգ քաշային կարգ, պոկում՝ արծաթե, հրում՝ ոսկե, երկամարտ՝ ոսկե մեդալ) և Դավիթ Հովհաննիսյանը (96 կգ, պոկում՝ ոսկե, հրում՝ բրոնզե, երկամարտ՝ ոսկե մեդալ)։
Երկամարտի գումարով երկրորդն են դարձել Արա Աղանյանը (96 կգ, պոկում՝ արծաթե պարգև, հրում՝ 4-րդ տեղ, երկամարտ՝ արծաթե մեդալ), Սամվել Գասպարյանը (102 կգ, պոկում՝ բրոնզե, հրում՝ արծաթե, երկամարտ՝ արծաթե մեդալ) և Վարազդատ Լալայանը (109 կգ-ից բարձր, պոկում՝ արծաթե, հրում՝ արծաթե, երկամարտ՝ արծաթե մեդալ)։
Ընդհանուր հաշվարկում երրորդ տեղն են գրավել Արսեն Մարտիրոսյանը (109 կգ, պոկում՝ 4-րդ տեղ, հրում՝ 4-րդ տեղ, երկամարտ՝ բրոնզե մեդալ) և Գոռ Մինասյանը (109 կգ-ից բարձր, պոկում՝ բրոնզե պարգև, հրում՝ 4-րդ տեղ, երկամարտ՝ բրոնզե մեդալ)։
Մեր մյուս մասնակիցներից Կարեն Մարգարյանը (81 կգ) 4-րդ արդյունքն է գրանցել առանձին վարժություններում և երկամարտում։ 89 կգ քաշային Անդրանիկ Կարապետյանը պոկում վարժությունից նվաճել է արծաթե մեդալ, իսկ հրում մրցաձևում և երկամարտում գրավել է 5-րդ տեղը։
Նույն քաշային կարգում Վարդան Մանուկյանը պոկում վարժությունից 7-րդն էր, իսկ հրումից և երկամարտից ստացել է 0։
ԵՎՐՈՊԱՅԻ ԱՌԱՋՆՈՒԹՅԱՆ ՏՂԱՄԱՐԴԿԱՆՑ ՄՐՑՈՒՄՆԵՐԻ ՄԵԴԱԼԱՅԻՆ ՀԱՇՎԱՐԿ
Ո Ա Բ Ը
1. Բուլղարիա 13 4 5 22
2. Հայաստան 4 9 5 18
3. Վրաստան 4 7 3 13
4. Իտալիա 3 0 1 4
5. Իսպանիա 2 4 5 11
6. Թուրքիա 2 1 3 6
7. Ֆրանսիա 1 0 1 2
8. Ալբանիա 1 0 0 1
9. Գերմանիա 0 3 1 4
10. Ուկրաինա 0 1 2 3
11. Լեհաստան 0 1 1 2
12. Չեխիա 0 0 1 1
13. Մոլդովա 0 0 1 1
14. Ավստրիա 0 0 1 1
Միավորներով թիմային հաշվարկում Հայաստանի տղամարդկանց հավաքականը դարձյալ երկրորդն է (Բուլղարիայից հետո), իսկ կանանց ընտրանին 19-րդ տեղում է։
Բոլոր քաշային մարզիկների անհատական միավորներով հաշվարկում հայ ծանրորդներից առավել բարձր է դասվել Սամվել Գասպարյանը (4-րդ տեղ), որին հաջորդում են Ռաֆիկ Հարությունյանը (7-րդ), Անդրանիկ Կարապետյանը (11-րդ), Վարազդատ Լալայանը (13-րդ), Գոռ Մինասյանը (16-րդ), Դավիթ Հովհաննիսյանը (17-րդ), Արա Աղանյանը (21-րդ), Կարեն Մարգարյանը (27-րդ)։
Կանանց մրցումներում Հայաստանը 1 բրոնզե մեդալով 20-րդն է։ Այդ պարգևը նվաճել է 76 կգ քաշային Տաթև Հակոբյանը, որը 3-րդ տեղն է գրավել պոկում վարժությունում, իսկ հրում մրցաձևում և երկամարտում ստացել է 0։ Մեր մյուս երկու մարզուհիները գրանցել են այսպիսի արդյունքներ. Իզաբելա Յայլյան (55 կգ, պոկում՝ 5-րդ, հրում՝ 4-րդ, երկամարտ՝ 5-րդ տեղ), Հռիփսիմե Խուրշուդյան (87 կգ, պոկում՝ 4-րդ, հրում՝ 5-րդ, երկամարտ՝ 5-րդ տեղ)։