Ծանրամարտի Հայաստանի կանանց հավաքականը շարունակում է նախապատրաստությունը մայիսի 26-ին Ալբանիայում մեկնարկող Եվրոպայի առաջնությանը։
Մեր ընտրանու գլխավոր մարզիչ Արտաշես Ներսիսյանը ՀԱՕԿ-ի լրատվական ծառայությանը հայտնել է, որ ուսումնամարզական գործընթացն սկսվել է ծաղկաձորյան հավաքով, որի ընթացքում շեշտը հիմնականում դրվել է մարզուհիների ընդհանուր ֆիզպատրաստականության բարելավմանը։
Այժմ թիմը պարապում է Աբովյանի մարզահանգրվանում: Այստեղ արդեն մարզիչներն ուշադրություն են դարձնում ծանրորդուհիների հատուկ ֆիզպատրաստականության որակներին։
Ընդամենը 10 օրից 76 կգ քաշային Միլենա Խաչատրյանը կմեկնի Հունաստանում կայանալիք Եվրոպայի երիտասարդական առաջնությանը: Հավաքականի մյուս մարզուհիները նախապատրաստությունը կշարունակեն Երևանի «Օլիմպավան» մարզահամալիրում:
Ամփոփիչ փուլում առաջնային են լինելու մարզվողների անձնական քաշի կարգավորումը և արդյունքների աճի ապահովումը։
Եվրոպայի առաջնությունում Հայաստանի թիմի նախնական հայտում ընդգրկված են Իզաբելա Յայլյանը (55 կգ քաշային կարգ), Տաթև Հակոբյանը (81 կգ) և Հռիփսիմե Խուրշուդյանը (87 կգ)։