Հայ ջրացատկորդներն սպասվածից համեստ արդյունքներ են գրանցել Բուդապեշտում կայացած ջրային մարզաձևերի աշխարհի առաջնությունում։
Նման խոշոր մրցումներում նորամուտը նշած Ալիսա Զաքարյանը մեկ մետր բարձրության ոստնակից կանանց ցատկերում գրանցել է վատագույն արդյունքը: Ի դեպ, 14-ամյա հայուհին ջրացատկորդուհիների մրցումների ամենակրտսեր մասնակիցն էր։
Որակավորման փուլի արգելքը չի հաղթահարել նաև 10 մետր բարձրության աշտարակից տղամարդկանց ցատկերին մասնակցած Վլադիմիր Հարությունյանը, որը 288,55 միավորով 39 մասնակցի հաշվարկում գրավել է 33-րդ տեղը և չի անցել կիսաեզրափակիչ, որին մասնակցել է 18 ջրացատկորդ։
Մինչև մեկնարկը Հայաստանի հավաքականի գլխավոր մարզիչ Հրաչյա Չանդիրյանը VNews-ին հայտնել էր, որ առնվազն կիսաեզրափակիչում մրցելու ակնկալիք ունի Վլադիմիր Հարությունյանից։