Բուլղարիայի Պլովդիվ քաղաքում շարունակվում է հունահռոմեական ոճի ըմբշամարտի Եվրոպայի մինչև 23 տարեկանների առաջնությունը: Մրցումային երրորդ օրը Հայաստանի 3 ներկայացուցիչներ պայքարեցին բրոնզե մեդալի համար և 3-ն էլ կարողացան հաղթանակի հասնել։
60 կգ քաշային կարգում Տիգրան Մինասյանը 7-6 հաշվով հաղթեց հունգարացի մրցակցին և նվաճեց բրոնզե մեդալ։ 67 կգ քաշային կարգում Սահակ Հովհաննիսյանը 5-3 հաշվով հաղթեց իտալիայի ներկայացուցչին և նույնպես նվաճեց բրոնզե մեդալ։
72 կգ քաշային կարգում էլ Շանթ Խաչատրյանը տուշեով հաղթեց հունգարացի մրցակցին՝ նույնպես նվաճելով բրոնզե մեդալ։
Այսպիսով՝ հունահռոմեական ոճի ըմբշամարտի Հայաստանի հավաքականը Երևան է վերադառնում 3 բրոնզե մեդալով։
Շուտով պայքարի մեջ կմտնեն ազատ ոճայինները: