Մարզումային նոր համակարգի ներդրման և կիրառման հնարավորության մասին քննարկումներ են ծավալվել Հայաստանի դահուկային սպորտի ֆեդերացիայի լեռնադահուկային սպորտի և սնոուբորդի կոմիտեների հերթական նիստում։
Հանրապետական ֆեդերացիայի հաղորդմամբ՝ ՀԴՍՖ նախագահ Գագիկ Սարգսյանը հաշվետվություն է ներկայացրել մայիսի 25-26-ը Իտալիայի Միլանում կայացած Դահուկային սպորտի և սնոուբորդի միջազգային ֆեդերացիայի համաժողովին մասնակցության արդյունքների մասին։ Նիստում քննարկվել է տարիքային բոլոր խմբերի հավաքական թիմերում մարզումային նոր համակարգի ներդրման հնարավորության վերաբերյալ ՀԴՍՖ նոր նախաձեռնությունը։ Անցած մրցաշրջանում գրանցված արդյունքների հիման վրա մասնակիցները հաստատել են լեռնադահուկային սպորտի և սնոուբորդի՝ տարիքային տարբեր խմբերի հավաքականների ընդլայնված կազմերը։
Ֆեդերացիայի նախագահ Գագիկ Սարգսյանն ու լեռնադահուկային սպորտի կոմիտեի ղեկավար Արսեն Ներսիսյանը ներկայացրել են նախապատրաստական նոր համակարգի սկզբունքները, ձևաչափը և իրագործման մեխանիզմները, որոնց արդյունքներն ստուգվելու են որոշակի պարբերականությամբ անցկացվելիք ուսումնամարզական հավաքների ընթացքում՝ թեստային տարբերակով։
Արսեն Ներսիսյանը նիստի մասնակիցների քննարկմանն է ներկայացրել թեստային համակարգում ընդգրկված նորմատիվային վարժությունները։ Ծավալուն քննարկման արդյունքում որոշվել է ընդունել ներկայացված առաջարկները, վերամշակել դրանք և հուլիսի առաջին տասնօրյակում նախատեսված առաջին ուսումնամարզական հավաքն անցկացնել նոր ձևաչափով։