Գավաթի կիսաեզրափակիչ առաջին հանդիպումների ամենաուշագրավ իրադարձությունները ներկայացնում ենք 10 փաստի տեսքով:
1․ VBET Հայաստանի գավաթի կիսաեզրափակիչ առաջին հանդիպումներն անցան դաշտի տերերի առավելությամբ, որոնք տոնեցին մեկ հաղթանակ, մեկ խաղ ավարտեցին ոչ-ոքի: Գավաթի ընթացիկ խաղարկությունում կայացած 21 հանդիպումներում դաշտի տերերը 8 հաղթանակ են տոնել, հյուրերն առավելության են հասել 7 անգամ, 6 խաղում էլ գրանցվել է ոչ-ոքի:
2 խաղում խփվեց 4 գոլ: Անցկացված 21 հանդիպումներում գրանցվել է 52 գոլ (միջինը մեկ խաղում՝ 2,47 գոլ):
2․ Գավաթի ընթացիկ խաղարկությունում «Ալաշկերտի» 4 անընդմեջ հաղթանակների շարքն ընդհատվեց: Գավաթի մրցաշարերում ալաշկերտցիներին առաջին անգամ չհաջողվեց հաղթել «Նոային», որին պարտության էր մատնել նախորդ 4 հանդիպումներում էլ:
3․ «Նոան» շարունակեց գավաթի մրցաշարերում անպարտելի խաղերի շարքը՝ հասցնելով 8-ի: Հետաքրքիր է, որ վերջին պարտությունը «Նոան» կրել էր գավաթի 2018/19թթ. խաղարկությունում հենց «Ալաշկերտից»՝ քառորդ եզրափակիչի պատասխան խաղում զիջելով նվազագույն հաշվով: Այն ժամանակ «Նոան» հանդես էր գալիս «Արցախ» անվանումով:
4․ «Արարատը», որ 13 տարի անց կրկին հանդես եկավ կիսաեզրափակիչում, այդ փուլում դարձյալ հաղթեց՝ տոնելով գավաթի ընթացիկ մրցաշարում 4-րդ հաղթանակը: Հիշեցնենք, որ վերջին անգամ արարատցիները գավաթի կիսաեզրափակիչում խաղացել էին 2008թ. և առաջին խաղում հաղթել էին «Փյունիկին»՝ 2-1: «Արարատը» գավաթի ընթացիկ խաղարկության ամենաարդյունավետ թիմն է, որը 5 խաղում 13 գոլ է խփել: