Հայաստանի երիտասարդական հավաքականը հերթական պարտությամբ ավարտեց իր անփառունակ ելույթները 2017թ. Եվրոպայի երիտասարդական առաջնության ընտրական մրցաշարում, որը 12-րդն էր մեր ընտրանու համար:
Իր ողջ պատմության ընթացքում ՀՀ երիտասարդական հավաքականն ամենավատագույն արդյունքը ցույց տվեց: Ընտրական մրցաշարում անցկացրած 10 հանդիպումներում հավաքականը վաստակեց ընդամենը 1 միավոր՝ սեփական հարկի տակ ոչ-ոքի (1:1) ավարտելով Լյուքսեմբուրգի հավաքականի հետ կայացած մրցավեճը: Մեր ֆուտբոլիստները վաստակեցին հնարավոր միավորների ընդամենը 3,33 տոկոսը: Մինչ այդ առավել անհաջող մեր ֆուտբոլիստները հանդես էին եկել 1996թ. ընտրական մրցաշարում՝ վաստակելով հնարավոր միավորների ընդամենը 10 տոկոսը:
Արդեն ընտրական մրցաշարի մեկնարկում երիտասարդական հավաքականը ձախողվեց՝ Արտակ Օսեյանի գլխավորությամբ կրելով 3 անընդմեջ պարտություն ռումինացիների (0:3, 2:3) և բուլղարացիների (0:2) հետ հանդիպումներում: 4-րդ տուրում մեր ֆուտբոլիստներին չհաջողվեց սեփական հարկի տակ առավելության հասնել նույնիսկ Լյուքսեմբուրգի հավաքականի նկատմամբ՝ բավարարվելով ոչ-ոքիով: Ինչպես պարզվեց հետագայում, դա ընտրական մրցաշարում մեր հավաքականի վաստակած միակ միավորն էր:
Ուելսի (1:2) և Դանիայի (0:2) հավաքականներից կրած պարտություններից հետո Արտակ Օսեյանը պաշտոնանկ արվեց: Սակայն հավաքականի ղեկը նրանից ստանձնած Կարեն Բարսեղյանին էլ չհաջողվեց գոնե որոշ չափով շտկելու դրությունը: Նրա օրոք մեր ընտրանին պարտվեց անցկացրած բոլոր 4 խաղերում էլ (Դանիա՝ 1:3, Բուլղարիա՝ 0:1, Լյուքսեմբուրգ՝ 0:1, Ուելս՝ 1:3):
Ընտրական այս մրցաշարում Հայաստանի երիտասարդական հավաքականը ևս մեկ հակառեկորդ սահմանեց՝ կրելով 6 անընդմեջ պարտություն: Նախկինում մեր ֆուտբոլիստները 1996 և 1998թթ. ընտրական մրցաշարերում 5 անընդմեջ պարտություն էին կրել:
VivaroNews.am-ը ներկայացնում է Հայաստանի երիտասարդական հավաքականի ցուցանիշները Եվրոպայի երիտասարդական առաջնության ընտրական մրցաշարերում:
ԸՄ | Խ | Հ | Ո | Պ | Գ | Մ | % | Տ |
1996 | 10 | 1 | 0 | 9 | 8:31 | 3 | 10 | 6 (6) |
1998 | 8 | 1 | 0 | 7 | 8:31 | 3 | 12,5 | 5(5) |
2000 | 8 | 1 | 1 | 6 | 6:27 | 4 | 16,6 | 5(5) |
2002 | 10 | 4 | 2 | 4 | 10:15 | 14 | 46,6 | 5(6) |
2004 | 8 | 1 | 2 | 5 | 5:17 | 5 | 20,8 | 5(5) |
2006 | 10 | 1 | 2 | 7 | 2:25 | 5 | 16,6 | 6 (6) |
2007 | 2 | 1 | 0 | 1 | 3:3 | 3 | 50 | 2(3) |
2009 | 8 | 3 | 1 | 4 | 8:16 | 10 | 41,6 | 4(5) |
2011 | 10 | 4 | 1 | 5 | 18:19 | 13 | 43,3 | 4(6) |
2013 | 8 | 4 | 3 | 1 | 11:5 | 15 | 62,5 | 2(5) |
2015 | 8 | 3 | 0 | 5 | 7:19 | 9 | 37,5 | 4(5) |
2017 | 10 | 0 | 1 | 9 | 6:21 | 1 | 3,33 | 6 (6) |