Հնդկական Applause Entertainment ընկերությունը սերիալ կնկարահանի քաղաքական գործիչ Մահաթմա Գանդիի կյանքի մասին։ Սերիալի ստեղծողներն ապագա նախագիծը համեմատում են թագավորական ընտանիքի մասին պատմող «The Crown» բրիտանական հեռուստասերիալի հետ, հայտնում է Deadline-ը:
«Գանդին համաշխարհային գործիչ էր, ինչը շատ կարևոր է։ Սա մարդկության պատմությունն է։ Մենք խորապես ներգրավված ենք սցենարի և քասթինգի աշխատանքներում: Նախատեսում ենք նկարահանումները սկսել հաջորդ ամառ»,- ասել է սերիալի ստեղծող Նաիր Սամիրը։
Պատմությունը հիմնված է լինելու հնդիկ պատմաբան Ռամաչանդրա Գուհայի «Գանդին մինչև Հնդկաստանը» և «Գանդի. տարիներ, որոնք փոխեցին աշխարհը» կենսագրական գրքերի վրա։ Սերիալը ներկայացնում է Գանդիի ճանապարհորդությունը Հարավային Աֆրիկայում իր իրավական կարիերայի սկզբից մինչև Հնդկաստանի անկախության համար քաղաքական պայքարը:
Applause Entertainment-ը բանակցություններ է վարում պոտենցիալ գործընկերների հետ այն երկրներում, որտեղ ապրել է Գանդին (Հարավային Աֆրիկա և Մեծ Բրիտանիա):
Քասթինգը շարունակվում է, սակայն գլխավոր դերն արդեն ստացել է նույնանուն դերասան Պրատիկ Գանդին։