Հայաստանի բասկետբոլի ֆեդերացիայի նախագահ և ՀԱՕԿ-ի գլխավոր քարտուղար Հրաչյա Ռոստոմյանը շնորհավորել է բասկետբոլի տղամարդկանց Հայաստանի ընտրանուն Եվրոպայի փոքր երկրների առաջնությունում տարած հաղթանակի կապակցությամբ և վստահեցրել, որ հաղթանակները շարունակական են լինելու։
«Բասկետբոլի Հայաստանի ազգային հավաքականը կրկին փոքր երկրների Եվրոպայի առաջնության հաղթող է, ինչի առթիվ ի սրտե շնորհավորում եմ բոլորիս: Ռեքս Քալամյանին հաջողվել է ստեղծել մարտունակ թիմ, որը վստահ հաղթանակներ տոնեց Մալթայում կայացած առաջնությունում և ուրախացրեց հայ մարզասերներին հերթական տիտղոսով:
Բասկետբոլային տոնն սկսվել էր Երևանում, երբ մեծ թվով հանդիսականների ներկայությամբ Հայաստանի ընտրանին արժանի ելույթ ունեցավ ՍԱԴԱ-ի գավաթի խաղարկությունում:
Այդ երկու մրցաշարերը մեծ ոգևորություն առաջացրին Հայաստանում, և վստահ եմ՝ նոր զարկ կհաղորդեն բասկետբոլի զարգացմանը և մասսայականացմանը:
Առանձնահատուկ շնորհակալություն եմ հայտնում ֆեդերացիայի ամբողջ անձնակազմին, մարզիչներին, խաղացողներին և բոլոր անդամներին, որոնց նվիրված աշխատանքի շնորհիվ գրանցվեցին այս հաջողությունները:
Հ.Գ. Եթե ձեզ հետաքրքրում է, թե ինչպես են կերտվում հաղթանակները, ինչպես են կառուցվում ազգային հավաքականները, ասեմ, որ սկզբում ունեցել ենք փակուղային իրավիճակներ, երբ ոչ հեռավոր 2006-ին մեզ որպես կապիտալ հանձնվեց ընդամենը մի երկու կնիք: Սակայն այդ շրջանի անհաջողությունները մեզ չկոտրեցին, և քայլ առ քայլ շարժվեցինք ու շարժվում ենք դեպի մեր նպատակը:
Այժմ, երբ հետհայացք ենք նետում, տեսնում ենք, որ սրտացավ աշխատանքը տվել է իր պտուղները, և կարող ենք վստահ ասել, որ հաղթանակների ուղին շարունակելի է»,- նշել է Հրաչյա Ռոստոմյանը սոցցանցերում կատարած գրառման մեջ։
Նա Եվրոպայի երիտասարդական առաջնությունում ունեցած փայլուն ելույթների և արժանիորեն նվաճած մեդալների կապակցությամբ շնորհավորել է նաև հայ ըմբիշներին ու մարզիչներին՝ նշելով, որ այդ հաջողություններում հսկայական է Ըմբշամարտի ֆեդերացիայի նախագահ Ռոբերտ Խաչատրյանի ավանդը: