Շուրջ 6-ամյա ընդմիջումից հետո մեծ սպորտ վերադառնալու որոշում կայացրած ծանրորդ Հռիփսիմե Խուրշուդյանը մրցանակային հավակնություններով է պատրաստվում մայիսի 28-ից հունիսի 5-ն Ալբանիայում կայանալիք Եվրոպայի առաջնությանը։ VNews-ի հետ զրույցում մարզուհին նշեց՝ վճռականորեն տրամադրված է ապացուցելու, որ 2016-ին իր հետ տեղի ունեցածը թյուրիմացություն էր։
Մարզուհին հավատում է, որ կկարողանա նորից հայտնվել եվրոպական ստուգատեսի պատվանդանին, այլապես չէր վերսկսի իր մարզական կարիերան։
Նա նշեց է, որ վերադարձը դժվարությամբ է տրվում, սակայն մրցակցային ոգին իրեն առաջ է մղում դեպի նպատակի իրականացում։
«6 տարվա դադարից հետո անչափ դժվար է վերադառնալ նախկին կենսակերպին։ Տևական ընդմիջումը և մայրանալն ասում են իրենցը. մկաններս ամբողջությամբ թուլացած էին, որովհետև 2016-ից հետո բացարձակապես չէի մարզվել։
Հիմա կարծես զրոյական մեկնակետից եմ սկսել ամեն ինչ։ Պրոֆեսիոնալ սպորտը լուրջ զոհաբերություններ և քրտնաջան աշխատանք է պահանջում։
Շատ կարևոր է դիմանալ լարվածությանը, չընկրկել դժվարությունների առաջ։ Դա անհնար է առանց կամային որակների գերլարման։
Հուսով եմ՝ կստացվի, կկարողանամ, այլապես հաստատ չէի վերադառնա մեծ սպորտի փշոտ արահետ»,- VNews-ին հավաստիացրեց մարզուհին։
Խուրշուդյանը նշեց նաև, որ իր որոշումը պարզապես կանացի քմահաճություն չէ.
«Հավատացեք՝ իմ դեպքում դա մարդկային և մարզական սկզբունքի հարց է։ Հանձնվող տեսակ չեմ և ցանկանում եմ պայքարել ու ապացուցել, որ տեղի ունեցածը թյուրիմացություն էր։ Եթե այդ չարաբաստիկ դոպինգային սկանդալը չլիներ, չէի ընդմիջի մարզումներս»,- ընդգծեց նա։
Անդրադառնալով մարզումներին ընթացքին՝ մեր զրուցակիցը հայտնեց, որ առայժմ գոհ չէ իր արդյունքից.
«2016 թվականի համեմատ՝ երկամարտի ցուցանիշս մոտ 15 կիլոգրամով ցածր է։ Պոկում վարժությունում տարբերությունը կազմում է շուրջ 5, իսկ հրում մրցաձևում՝ 10 կգ։
Կարծում եմ՝ 1-1,5 ամսում հնարավոր է լրացնել այդ տարբերությունը։ Բարեբախտաբար, ժամանակը դեռ ներում է։ Հուսով եմ՝ Եվրոպայի առաջնությունում լավ կիլոգրամներ կբարձրացնեմ և կպայքարեմ մեդալների համար։ Դրա հնարավորությունը կա»։
ՎՆԱՍՎԱԾՔԻ ՄԱՍԻՆ
«Ոտքիս հոդային վնասվածքն է փոքր-ինչ արգելակում առաջընթացս։ Հակառակ պարագայում վաղուց լրացրած կլինեի կիլոգրամների նշված պակասը։ Ցավը երբեմն այն աստիճան է սրվում, որ մարզումների ժամանակ նույնիսկ արտասվում եմ, բայց նույն պահին էլ մոռանում եմ այդ ամենը և վերսկսում մարզումներս։ Ցանկացած պարագայում կմասնակցեմ Եվրոպայի առաջնությանը՝ նույնիսկ ցավազրկող ներարկումներով։ Միայն թե այդ հանգամանքը կարող է փոքր-ինչ բացասաբար անդրադառնալ արդյունքիս։
Ամեն դեպքում, հնարավոր ամեն ինչ անում եմ, որպեսզի մեդալով վերադառնամ այդ առաջնությունից։ Իսկ հեռահար նպատակների մասին դեռ վաղ է խոսելը. այդ հարցում հստակություն կլինի եվրոպական ստուգատեսից հետո։
Միանշանակ պայքարելու եմ մեդալի համար, իսկ դրա գույնի և արժեքի մասին խոստումներ տալ չեմ կարող»,- ասաց Հռիփսիմե Խուրշուդյանը։
Օգտվելով առիթից՝ մարզուհին շնորհավորեց բոլոր հայուհիներին Մայրության և գեղեցկության տոնի առթիվ.
«Շնորհավորում եմ մեր բոլոր մարզուհիներին, մարզաշխարհի կանանց և աղջիկներին, մեր մայրերին ու ընդհանրապես բոլոր հայրենակցուհիներին այս գեղեցիկ տոնի առթիվ։ Մաղթում եմ, որ երբեք չհանձնվեն, պայքարեն մինչև վերջ և բարձր պահեն հայ ազգի պատիվը»,- VNews-ի հետ զրույցում իր խոսքը եզրափակեց Հռիփսիմե Խուրշուդյանը:
