Տիգրան Պետրոսյանի անվան շախմատի տանն ընթացող Կարեն Ասրյանի 13-րդ հուշամրցաշարի 4-րդ տուրում ուշադրության կենտրոնում առաջատարների միջև կայացած մրցախաղերն էին:
Առայժմ առանց միավորի կորստի են ելույթ ունենում Շանթ Սարգսյանն ու Հովիկ Հայրապետյանը, որոնք 4-րդ անընդմեջ հաղթանակները տոնեցին: Սարգսյանը հաղթեց Դավիթ Շահինյանին, Հայրապետյանն էլ պարտության մատնեց Արսեն Դավթյանին:
Շանթ Սարգսյանն ու Հովիկ Հայրապետյանը 4-ական միավորով գլխավորում են մրցաշարային աղյուսակը: 3,5-ական միավորով առաջատարներին հետապնդում են Արթուր Դավթյանը, Սամվել Տեր-Սահակյանը, Ամին Տաբատաբաեին, Զավեն Անդրիասյանը, Անդրեյ Դերբենյովն ու Մանուել Պետրոսյանը:
Հուշամրցաշարի կին մասնակիցներից լավագույն արդյունքն ունեն Մարիամ Մկրտչյանն ու իրանցի Վեսալ Համեդին:
Վաղը կայանալիք 5-րդ տուրում ուշադրության կենտրոնում կլինի առաջատարների՝ Շանթ Սարգսյանի և Հովիկ Հայրապետյանի մրցախաղը:
