Logo

Ի՞նչ է լինելու հետո. Մեսիի՝ «Բարսելոնայից» հեռանալու լավ և վատ կողմերը

Հեղինակ
Իշխան Մելքոնյան
00:00 / 11.08.2021ՍՊՈՐՏ
Բացառիկ
Feature image laportaMessi and Koeman Feature Image - Ի՞նչ է լինելու հետո. Մեսիի՝ «Բարսելոնայից» հեռանալու լավ և վատ կողմերը

Մեսիի՝ «Բարսելոնայից» հեռանալու շոկային լուրից հետո արդեն 5 օր է անցել: Միևնույն է՝ շատերը չեն համակերպվում այդ մտքի հետ, բայց կյանքը շարունակվում է, ամեն անցնող օրվա հետ էլ կրքերը սառում են: Այո՜, «Բարսելոնան» կորցրեց իր պատմության լավագույն ֆուտբոլիստին, կորցրեց այն պահին, երբ առհասարակ պատրաստ չէր:

Այնուամենայնիվ՝ Մեսիի հեռանալը՝ հենց կատալոնացիների համար, ունի նաև լավ կողմեր: Ներկայացնում ենք վերջին օրերի ամենաաղմկահարույց իրադարձության լավ ու վատ կողմերը: Սկսենք, բնականաբար, վատից:

Վատ կողմերը

«Բարսելոնան» դեռ պատրաստ չէր

«Բարսելոնայում» պատրաստվում էին պոստ-Մեսի ժամանակաշրջանին: Ակումբը փորձում էր երիտասարդ կադրեր զարգացնել ակադեմիայից, գնել՝ թիմի խաղին ու փիլիսոփայությանը համապատասխան ֆուտբոլիստներ, ինչպես, օրինակ՝ Պեդրիի դեպքում: Բայց այդ գործընթացը դեռ հեռու էր ավարտվելուց:

«Բարսելոնան», առհասարակ, դեռ որպես թիմ չէր հասցրել դուրս գալ նախորդ տարիների փառահեղ, բայց արդեն սպառված ժամանակաշրջանից: Ակումբը վերջին 3-4 տարիներին փորձում է նոր փուլ սկսել: Էռնեստո Վալվերդեի հետ «Բարսան» Իսպանիայի չեմպիոն դարձավ, բայց ձեռագիր կամ, այլ կերպ ասած, ֆուտբոլային դիմանկար ձեռք չբերեց: Հետո եկավ Կիկե Սետյենը, և «Բարսելոնայի» երկրպագուները մինչև հիմա փորձում են մոռանալ իրենց սիրելի թիմի պատմության այդ տխրահռչակ ժամանակահատվածը: 2020-ի ամռանը կատալոնական ակումբը գլխավորեց Ռոնալդ Կումանը: Հոլանդացի մասնագետի մոտ էլ ամեն ինչ հեշտ չսկսեց, բայց մրցաշրջանի երկրորդ հատվածից Կումանի թիմը զարգանալու նշաններ ցույց տվեց: Այս տարի «Բարսան» պետք է էլ ավելի ավելացներ՝ հաշվի առնելով նաև համալրումները: Զարգացման այս կարևոր փուլում շատ մեծ կլիներ Մեսիի դերակատարությունը, բայց…

Show more respect to Lionel Messi': Ronald Koeman after contract leak | Sports News,The Indian Express

Կադրային առումով էլ «Բարսան» պատրաստ չէ խաղալ առանց Մեսիի: Պեդրին, Ֆատին, դե Յոնգը, Դեստն ու ակադեմիայի տաղանդավոր սաները դեռ չեն հասել այն խաղամակարդակին, երբ պատրաստ կլինեին ակումբի հետ պայքարել ամենակարևոր տիտղոսները նվաճելու համար՝ առանց Մեսիի:

Թիմը մնում է առանց տարբերություն ստեղծողի

«Բարսելոնան» մնում է առանց իր առաջատարի (խաղադաշտում ու խաղադաշտից դուրս), առանց այն ֆուտբոլիստի, որը տարեկան 40-50 գոլ էր ապահովում, առանց իր՝ տարբերություն ստեղծող ֆուտբոլիստի:

Մեսին աշխարհում այն եզակի ֆուտբոլիստներից է, որ կարողանում է ոչնչից ստեղծել պահեր, նահանջել, վերցնել գնդակը կենտրոնից ու մեկ փոխանցումով կամ անցումներով գոլային գրոհներ կառուցել: «Բարսելոնայի»՝ վերջին տարիների ամենածանր պահերին՝ երբ թիմի մոտ ոչինչ չէր ստացվում, երբ հարձակման գծում թիմի խաղը փակուղի էր մտնում, Մեսին իր խաղով՝ գրեթե միայնակ օգնության էր հասնում և փրկում թիմին՝ պահելով չեմպիոնական պայքարում: Հիմա «Բարսան» այդ ֆուտբոլիստին չի ունենա և Մեսիի կառուցած խաղն ու խփած գոլերը պետք է փնտրի այլ ֆուտբոլիստների շրջանում:

barcacentre on Twitter: "The idea is for Memphis Depay, Frenkie de Jong, Antoine Griezmann and Clément Lenglet to be available for Ronald Koeman on Saturday against Girona. [as]… https://t.co/my4ALhdrt6"

Օրինակ՝ Ռոնալդուի՝ «Ռեալից» հեռանալուց անցել է 3 տարի, բայց «Արքայական ակումբը» դեռ գոլ խփելու հետ կապված խնդիր ունի: Միայն Բենզեման բավական չէ:

Մեծ է նաև Մեսիի հեռանալու հետևանքով առաջացած կոմերցիոն վնասը: Ըստ Brand Finance-ի՝ կատալոնական ակումբին Մեսիի հեռանալը կարժենա 137 մլն եվրո: Ակումբի կոմերցիոն եկամուտները կնվազեն 77 մլնով, (17 մլն՝ խաղերից), իսկ ակումբի բրենդի գինը կնվազի 43 մլնով:

Մեր ընտրանին

Մեսիի՝ ՊՍԺ տեղափոխությունը կարող է նպաստել Մբապեի տեղափոխությանը «Ռեալ»

Մեսիի՝ «Բարսելոնայից» հեռանալը, գուցե, դեռ վերջին հարվածը չէ «Բարսելոնային»:

Արգենտինացու տեղափոխությունը ՊՍԺ հեշտացնում է Կիլիան Մբապեի՝ «Ռեալ» տեղափոխությունը: Մինչև Մեսիի ավելի քան հավանական ժամանումը Փարիզ, «Ռեալը» գրեթե վերջնականապես համակերպվել էր, որ Մբապեին այս ամռանը հաստատ չի կարողանա գնել: Բայց Մեսիի հավանական տեղափոխությունը ՊՍԺ զգալիորեն փոխում է իրավիճակը: Այժմ ՊՍԺ-ն բախվելու է նույն խնդրին, ինչ՝ «Բարսելոնան». որքանո՞վ է հնարավոր լինելու թիմում պահել Նեյմարին, Մբապեին ու Մեսիին, վճարել այս երեքի բարձր աշխատավարձը՝ չխախտելով ֆինանսական ֆեյր-փլեյի կանոնները: Նեյմարը ստանում է տարեկան 36 մլն, նույնքան կստանա Մեսին, Մբապեի աշխատավարձն էլ ավելի քան 20 մլն է:

Мбаппе, Месси, Джака.... Главные трансферные новости 22-го июня

Մբապեի՝ «Ռեալ» տեղափոխության դեպքում «Բարսելոնայի» և իր սկզբունքային մրցակցի միջև ուժերի հավասարակշռությունը կթեքվի մադրիդցիների կողմը:

Լավ կողմերը

Գրիզմանն ու թիմի մյուս երիտասարդները կստանան խաղային ազատություն

Մեսիի հեռանալով ամենից շատը, խաղային իմաստով, շահեց Անտուան Գրիզմանը: Ֆրանսիացին կատալոնական ակումբում անցկացրած 2 մրցաշրջանում չէր գտնում իր տեղը, ինչի հետևանքով էլ չէր խաղում այն խաղը, որ նա ցուցադրում էր «Ատլետիկոյում», որն ակնկալում էին «Բարսելոնայի» երկրպագուները: Գրիզին առաջին մրցաշրջանում խփեց 15 գոլ, երկրորդում՝ 20: Վատ թվեր չեն, բայց, նախ, զիջում են «Ատլետիկոյում» նրա ցուցանիշներին, և բացի դա՝ Գրիզմանը թիմի խաղի վրա չէր ունենում այն ազդեցությունը, որն ունենում էր նախկին թիմերում և Ֆրանսիայի հավաքականում:

Պատճառը պարզ է՝ Գրիզմանն ու Մեսին խաղում էին նույն դիրքում, և բնական է, որ Մեսիի ներկայությունը դաշտում սահմանափակելու էր Գրիզմանի հնարավորությունները՝ իր ամբողջ ներուժը ցույց տալու հարցում: Գրիզմանը երբեմն խաղում էր աջից, երբեմն՝ ձախից, երբեմն՝ հարձակման կենտրոնում, մինչդեռ իր ամենասիրելի՝ ենթահարձակվողի/խաղարկողի դիրքը միշտ զբաղեցնում էր Մեսին: Արգենտինացու հեռանալուց հետո, գուցե, «Բարսելոնայում» վերջապես տեսնենք իրական և ամենաուժեղ Գրիզմանին:

Man Utd 'preparing Antoine Griezmann transfer bid with Barcelona desperate for money after losing Lionel Messi'

Մեսիի հեռանալով՝ հարձակման գծի (և ոչ միայն) մյուս երիտասարդները նույնպես ավելի մեծ կարևորություն կստանան: Ֆիլիպե Կոուտինյոն, եթե մնա, նոր շանս կստանա, Պեդրին, Ֆատին, Դեպայը… բոլորը կունենան ավելի շատ խաղաժամանակ և ավելի մեծ պատասխանատվություն՝ թիմին առաջ տանելու հարցում:

Հակապրեսինգը՝ 10 հոգով

Մեսին «Բարսելոնայի» հարձակման գծում անփոխարինելի ֆուտբոլիստ է: Թիմում ոչ ոք չի կարող ավելի լավ գրոհներ սկսել, ստեղծագործել ու գոլեր խփել, քան Մեսին:

Բայց երբ գնդակը մրցակցի մոտ է, «Բարսելոնան» կարող է ավելի ակտիվ և ինտենսիվ հակապրեսինգ կիրառել: Մեսին համեմատաբար քիչ էր ճնշում գործադրում մրցակիցների վրա, նրա ուսերին այդ պահանջը չէր էլ դրվում: Նա քիչ էր աշխատում, երբ գնդակը մրցակցի մոտ էր: Այդ ամենը մեծ ազդեցություն չէր ունենում Իսպանիայի առաջնության շարքային խաղերում, տարիներ առաջ էլ, երբ «Բարսան» ունենում էր գնդակի 80-85 տոկոսի առավելություն, դա քողարկվում էր: Բայց վերջին տարիներին, հատկապես Չեմպիոնների լիգայի վճռորոշ խաղերի ժամանակ մրցակիցներն օգտվում էին իրենց առավելությունից և խաղադաշտի կենտրոնն անցնում ավելի հեշտությամբ:

Այժմ «Բարսելոնայի» հակապրեսինգն անգլիական, գերմանական ու իտալական թոփ թիմերի դեմ կաշխատի ավելի ուժեղ:

Նոր փուլի սկիզբն ու նոր սուպերաստղը

Պոստ-Մեսի ժամանակաշրջանը «Բարսելոնայի» համար վաղ թե ուշ մեկնարկելու էր: «Բարսելոնայի» համար հնարավորություն է կյանքի նոր փուլ սկսելու՝ թեկուզ առանց Մեսիի, թեկուզ դժվարություններով:

Առաջին հերթին՝ «Բարսան» ֆինանսական ֆեյր-փլեյի առումով այլևս խնդիրներ չի ունենա և կսկսի կազմը նորովի կառուցել: Ճիշտ է՝ այս տարի ակումբի ֆինանսական իրավիճակը սարսափելի է, բայց պետք է հաշվի առնել, որ կան ֆուտբոլիստներ, որոնք դեռ կվաճառվեն ու կլցնեն բյուջեն, և բացի դա, երկրպագուներն առաջիկա մրցաշրջանում վերադառնում են տրիբունաներ, խաղերի տոմսերի վաճառքից էլ կգոյանան գումարներ, ինչը թույլ կտա «Բարսային» կատարել թոփ տրանսֆերներ:

Օրինակ՝ Էրլինգ Հալանդի համար մղվող պայքարում հաջորդ ամռանը «Բարսելոնան» կդառնա ֆավորիտներից մեկը: Նորվեգացին այս ամռանը չի հեռանա «Բորուսիայից», իսկ հաջորդ տարի նրա հրաժարագինը կազմելու է 75 մլն: Կմնա միայն համոզել ֆուտբոլիստին ու մարզական նախագծի իմաստով գրավել նրան և առաջարկել շահավետ պայմանագիր: Կատալոնական ակումբն, անկասկած, մրցակիցներ կունենա, բայց նաև կունենա բավարար միջոցներ՝ այդ մրցավազքում հաղթելու համար:

Haaland to Barcelona? Cash-strapped Catalans risk selling their soul to pay for superstar striker | Goal.com

Միացի՛ր հայկական ամենասպորտային Instagram-ին:


Մեզ կարող եք հետևել նաև Telegram-ում

Հարցում

Աղյուսակներ

Հայաստան, Պրեմիեր Լիգա