ԵՎՐՈ 2020-ին լավագույն արդյունքներ ցույց տվող թիմերի շարքում է Անգլիայի հավաքականը: Անգլիացիների կազմում ամենից շատ աչքի ընկնող ֆուտբոլիստներից մեկը Լյուկ Շոուն է, որի հասցեին գովեստի խոսքեր են հնչեցնում շատ մասնագետներ ու երկրպագուներ: Այժմ դժվար է հավատալ, որ 18 ամիս առաջ Շոուին ՄՅՈւ-ի կազմում ավելի ցածր կշիռ ուներ, քան երիտասարդ Բրենդոն Վիլյամսը, իսկ 2020-ին ակումբը նոր ձախ պաշտպան գնեց՝ այդ դիրքն ուժեղացնելու համար: Քչերն են ֆիքսել՝ որքան բարդ և քարքարոտ ճանապարհ է անցել Լյուկն ու ինչ փորձություններ է հաղթահարել՝ մինչև այս խաղամակարդակին հասնելը:
VNews-ը հայացք է գցում Շոուի բավական հետաքրքիր ու դրամատիկ կարիերային՝ վերհիշելով նրա ծանր օրերն ու ֆանտաստիկ քամբեքը:
«Մանչեսթեր Յունայթեդ». բարձր արժեքի ճնշումն ու վան Գալի դասը
2014-ին Շոուի կյանքում շոկային իրադարձություն տեղի ունեցավ: Որքան էլ նա լիներ լավ տվյալներով հեռանկարային երիտասարդ 18 տարեկանում «Մանչեսթեր Յունայթեդ» տեղափոխվելը, այն էլ 38 միլիոն եվրոյով, համաձայնեք, շատ մեծ ճնշում է:
Բացի ճնշումից ու երկրպագուների սպասումներից, Շոուի հիմնական խնդիրը «Յունայթեդի» պես մեծ թիմում ընտելանալն էր, բայց կար խոչընդոտ՝ ֆիզիկական ոչ օպտիմալ մարզավիճակ և սխալ սննդակարգ, ինչը միանգամից նկատել էր թիմի գլխավոր մարզիչ Լուի վան Գալն ու հայտնել ֆուտբոլիստին: Հոլանդացի մասնագետը չէր ընդգրկում Շոուին նույնիսկ թիմի ընդհանուր խմբի մարզումներին, և 18-ամյա խաղացողը ստիպված էր մարզվել անհատական ծրագրով՝ առանց վնասվածք ունենալու. «Շոուն ֆիզիկապես պատրաստ չէ անելու այն, ինչ ես ցանկանում եմ», – հայտարարել էր վան Գալը:
Իր առաջին մրցաշրջանում Շոուն Պրեմիեր լիգայում անցկացրեց ընդամենը 16 հանդիպում՝ առանձնապես լավ տպավորություն չթողնելով իր խաղով: Առաջին այս բարդ մրցաշրջանը փոքրիկ խնդիր էր միայն՝ հաշվի առնելով, թե ինչ էր սպասում հետագայում Շոուին: Փոխարենը՝ երիտասարդ խաղացողը կարևոր դաս քաղեց ու հոգեբանորեն կոփվեց, ինչը դեռ շատ մեծ նշանակություն էր ունենալու ապագայում:
Ոտքի կոտրվածքն ու ասպարեզից դուրս մնալը
Շոուն հաջորդ՝ 2015/16 մրցաշրջանին, լավ էր տրամադրված: Թիմին արդեն ճանաչում էր, ֆիզիկապես էլ աշխատել էր իր վրա և մտադիր էր վերջնականապես ամրապնդվել թիմի մեկնարկային կազմում. «Ես միայն ինքս ինձ պետք է մեղադրեի խնդիրներիս համար: Ոչինչ չգնաց այնպես, ինչպես ծրագրել էի, բայց ես դասեր քաղեցի և մեծ փորձ հավաքեցի», – հայտարարեց ֆուտբոլիստը, որ դեռ չգիտեր գլխի գալիքը:
Չեմպիոնների լիգայի խմբային փուլում «Յունայթեդը» մեկնել էր Նիդերլանդներ՝ խաղալու ՊՍՎ «Էյնդհովենի» դեմ: Խաղային դրվագներից մեկում հոլանդական ակումբի ֆուտբոլիստ Հեկտոր Մորենոն կոպիտ սահանկումով գնաց Շոուի հետ բախման և կոտրեց ֆուտբոլիստի ոտքը: 19-ամյա խաղացողի համար դա մեծ հարված էր՝ բառի բուն և փոխաբերական իմաստով, որի պատճառով նա բաց թողեց 288 օր՝ մոտ մեկ տարի: Հետագայում Շոուն հայտարարեց, որ կարող էր նույնիսկ կորցնել ոտքը:
Շարք վերադառնալուց հետո էլ Շոուն միանգամից լավ մարզավիճակ ձեռք չբերեց: 2016/17-ին նա 2 անգամ վնասվածք ստացավ՝ ընդհանուր առմամբ բաց թողնելով 25 խաղ:
Մոուրինյոյի բանտն ու նվաստացումները
Շոուի կարիերայի հաջորդ դժոխային էտապը, ինչպես շատ ֆուտբոլիստների կարիերայում, Մոուրինյոն էր:
Պորտուգալացին ոչ միայն շանս չէր տալիս Շոուին, այլ նրան փորձում էր հոգեպես կոտրել, և դա անում էր հրապարակային հայտարարություններով: Ամենահիշարժանը Մոուրինյոյի՝ 2017-ի մարտին արած հայտարարությունն է. «Ինձ համար դժվար է Շոուի համար նույնիսկ պահեստայինների նստարանում տեղ գտնել: Ես չեմ կարող համեմատել նրան Էշլի Յանգի հետ, Մատեո Դարմիանի հետ, Դեյլի Բլինդի հետ: Ես չեմ կարող համեմատել նրանց՝ մարզումներն անցկացնելու ձևը, նվիրվածությունը, կենտրոնացվածությունը, ամբիցիաները: Ես պարզապես չեմ կարող անել դա: Շոուն բոլորից չափազանց շատ է ցածր»:
Շոուի համար նման խոսքերը սեփական մարզչից լսելը ծանր էր, բայց նա ամենևին էլ չկոտրվեց: 2018-ին ամռանը, երբ թիմակիցներն իրենց արձակուրդն էին վայելում ամերիկյան լողափերում, Շոուն Քերինգթոնում՝ ՄՅՈւ-ի մարզաբազայում լրացուցիչ մարզումներ էր անցկացնում՝ Մոուրինյոյի դիրքորոշումը փոխելու համար: Պորտուգալացին տեսավ՝ ինչպես է Շոուն աշխատում ֆիզպատրաստության գծով մարզիչ Գարի Ուոքերի հետ ու գնահատեց այն, բայց արդեն ուշ էր՝ 2018/19 մրցաշրջանը չէր էլ հատել հասարակածը, երբ Ժոզեն հեռացվեց:
Լույս՝ թունելի վերջում. եկավ Սուլշերը
Շոուն սկսեց վերջապես «կենդանության նշաններ» ցույց տալ մարզչական փոփոխությունից հետո, երբ Ուլե Գունար Սուլշերը եկավ Մոուրինյոյի փոխարեն: Նորվեգացի մասնագետի գալով, իհարկե, Շոուի խաղը միանգամից չփոխվեց, բայց Սուլշերն իր ֆուտբոլիստին հրապարակավ փնովելու փոխարեն գոնե իր վստահությունը ցույց տվեց և կարևոր դեր խոստացավ թիմում:
Բացի Շոուին վստահություն հաղորդելը՝ Սուլշերի դերն ու նշանակությունը ֆուտբոլիստի կարիերայում նաև մեծ էր տակտիկական առումով: Իր գալու առաջին իսկ շաբաթներից հետո նորվեգացին Շոուին հորդորեց ավելի շատ առաջ շարժվել խաղադաշտում, բայց դրա համար պետք էր որոշ հմտություններ զարգացնել: Սուլշերն ու Շոուն հիմնական մարզումներից բացի հավելյալ ժամանակ տրամադրեցին ֆուտբոլիստի՝ եզրերից կատարած փոխանցումները հղկելու և գնդակի հետ վարվելու տեխնիկայի ուղղությամբ, ինչի արդյունքում Շոուն սկսեց ավելի շատ գոլային փոխանցումներ կատարել և գրոհներին միանալ ավելի մեծ արդյունավետությամբ՝ չկորցնելով գնդակը:
«Հոգեբանական առումով Լյուկը շատ լավ վիճակում է: Նրա խաղի բարձր ինտենսիվությունը շատ է տպավորում ինձ: Ես գիտեմ, որ նա դեռ կարող է անել ավելին». Սուլշեր
2020-ի ամռանը «Յունայթեդը» գնում է Ալեքս Տելեսին՝ 15 միլիոն եվրոյով՝ պաշտպանության ձախ եզրն ուժեղացնելու համար, բայց Շոուն Տելեսին միանգամից նստեցրեց պահեստայինների նստարանին՝ խաղալով շատ վստահ ֆուտբոլ: Անգլիացին ընդհանուր առմամբ, մասնակցեց 47 խաղի, դարձավ 1 գոլի և 5 գոլային փոխանցման հեղինակ:
Մեր ընտրանին
-
«Ամբիցիոզ, բայց համեստ երիտասարդը». որտեղից «ծլեց» Սանչոն և ուր հասավ
-
«Բոլբոյից՝ Գվարդիոլայի «նոր Մեսի». դռները բացե՜ք, Ֆոդենն է գալիս
-
Մեյսոն Մաունթ. ով է Լեմպարդի «բալիկը», որ դարձավ «Չելսիի» ամենաառանցքային ֆուտբոլիստը
«Շոուբերտո Կառլոսի» շոուն ԵՎՐՈ 2020-ում
Շոուն իր փայլուն մարզավիճակը տեղափոխեց արդեն միջազգային մակարդակ, ավելի կոնկրետ՝ ԵՎՐՈ 2020:
Առաջին խաղին պահեստայինների նստարանին նստելուց հետո՝ Շոուն շանս ստացավ շոտլանդացիների դեմ խաղում և այդ հանդիպումից հետո հաստատվեց թիմի մեկնարկային կազմում՝ դուրս թողնելով Կիրեն Տրիպյեին ու Բեն Չիլուելին: Անգլիայի հավաքականը հասել է կիսաեզրափակիչ ու բաց է թողել ընդամենը մեկ գոլ, այն էլ՝ տուգանային հարվածից: Անգլիայի հավաքականի պաշտպանությունում այդ սոլիդ տեսքը պայմանավորված է նաև Շոուի՝ ձախ եզրում վստահ խաղով:
Բացի պաշտպանվելը՝ Շոուն ցույց է տալիս նաև շատ մեծ սրություն հարձակման գծում: Գերմանիայի հավաքականի դեմ 1/8 եզրափակիչ խաղում Շոուի փոխանցումից հետո Ստեռլինգը բացեց հաշիվը, իսկ Քեյնի գոլի գրոհում նա իր ակտիվ մասնակցությունն ունեցավ: Ուկրաինայի դեմ խաղում արդեն Շոուն 2 ասիստ կատարեց: Առհասարակ՝ Եվրոպայի այս առաջնության ժամանակ Անգլիայի հավաքականի գրոհները կազմակերպվում են հիմնականում ձախ եզրով, և դրանք ավելի սուր են դառնում, երբ միանում է Շոուն՝ բարձրից կամ ցածրից կատարած փոխանցումներով: Ուշադրության է արժանի նաև Շոուի ֆիզիկական վիճակը. Դանիայի ընտրանու դեմ նույնիսկ 120-րդ րոպեին Շոուն խաղադաշտում տեղաշարժվում ու վազում էր այնպես, կարծես խաղի մեկնարկից 15 րոպե էր անցել միայն:
Գովեստի խոսքեր Ռոբերտո Կառլոսից ու թիմակիցներից
Իր փայլուն խաղի շնորհիվ Շոուն խաղընկերներից ստացել է «Շոուբերտո Կառլոս» մականունը՝ ի պատիվ լեգենդար ձախ պաշտպան Ռոբերտո Կառլոսի: Նրան Անգլիայի հավաքականում սիրում ու բարձր են գնահատում բոլորը:
The boys know.
😎 @LukeShaw23 pic.twitter.com/2hNsHkUqtF
— England (@England) July 4, 2021
«Կարծում եմ՝ Շոուի որակները միշտ էլ եղել են, պարզապես նա այժմ ֆիզիկապես պատրաստ է 100 տոկոսով: Լյուկի մեջ ամենից շատ ինձ տպավորում է նրա պահանջկոտությունն իր հանդեպ: Նա չի ցանկանում պարզապես լավ խաղալ, նա յուրաքանչյուր խաղին իր առջև նպատակ է դնում լինել լավագույնը խաղադաշտում», – նշում է Հարի Մագուայրը:
Բայց Շոուն ստացավ մեծագույն գնահատականը, որի մասին երազել կարող էր միայն: Գուցե՝ բոլոր ժամանակների լավագույն ձախ պաշտպան Ռոբերտո Կառլոսն է նույնիսկ խոսել Շոուի լավ խաղի ու միմյանց միջև համեմատության մասին. «Շոուն իսկապես կատարելագործել է իր խաղը: Նա կարևոր մասնիկ է Անգլիայի հավաքականում: Չեմ սիրում համեմատություններ տանել, մենք խաղացել ենք տարբեր ժամանակաշրջաններում: Ես խաղացել եմ իմ ժամանակ, նա՝ իր: Բայց մի բանով նման ենք հաստատ՝ հաղթելու մեծ ցանկությամբ», – հայտարարել էր Կառլոսը:
Իհարկե՝ Մոուրինյոն իր ոճով օրեր առաջ քննադատել էր Շոուին՝ մեղադրելով նրան չափազանց շատ եզրային փոխանցումներ կատարելու հարցում, բայց հիմա ո՞ւմ է հետաքրքրում Մոուրինյոյի մեկնաբանությունները Շոուի խաղի մասին: Հուլիսի 11-ին Շոուն կարող է դառնալ Եվրոպայի չեմպիոն, և դա լավագույն պատասխանը կլինի «Առանձնահատուկին», բայց առանց ոսկե մեդալի էլ Շոուն ապացուցելու ոչինչ չունի. նա արդեն սխալ է «հանել» Մոուրինյոյին՝ դառնալով աշխարհի լավագույն ձախ պաշտպաններից մեկը: