Հայաստանի ազգային հավաքականի կիսապաշտպան Էդուարդ Սպերցյանը Եվրոպա տեղափոխվելու որոշման դեպքում կարիերան Գերմանիայում շարունակելու տարբերակներ կունենա:
VNews-ին հայտնի է դարձել, որ 22-ամյա ֆուտբոլիստի ծառայություններով հետաքրքրվում է Լևերկուզենի «Բայերը»:
Այդուհանդերձ, «Կրասնոդարը» չի ցանկանում վաճառել թիմի առաջատարներից: Ռուսական ակումբում ուզում են, որ Սպերցյանը ևս մեկ տարի մնա թիմում: Նրան բաց կթողնեն միայն եվրոպական թոփ-ակումբ, որովհետև այդ դեպքում գործարքն իմիջային մեծ նշանակություն կունենա «Ցլերի» համար: Ֆուտբոլիստը նույնպես ցանկանում է ևս մեկ մրցաշրջան անցկացնել Ռուսաստանում:
Ավելի վաղ հայտնի էր դարձել, որ կիսապաշտպանի ծառայություններով լրջորեն հետաքրքրված է նաև Բունդեսլիգա վերադարձած Գելզենկիրխենի «Շալկեն»: Գերմանիայում կան նաև այլ ակումբներ, որոնք դիտարկում են Սպերցյանի թեկնածությունը, սակայն նրանք գործուն քայլեր չեն ձեռնարկում՝ ի տարբերություն «Բայերի» և «Շալկեի»:
Ռուսաստանի նախորդ առաջնությունում Սպերցյանը մասնակցել են 25 խաղի, խփել է 8 գոլ, կատարել 4 գոլային փոխանցում:
