Հայաստանի երիտասարդական հավաքականի կենտրոնական պաշտպան Աբով Ավետիսյանը փոխելու է ակումբը: 20-ամյա ֆուտբոլիստն ստիպված է հեռանալ հունգարական «Կիշվարդայից»:
Հունգարական ակումբների երկրորդ թիմերի առաջնությունում նոր մրցաշրջանից գործելու է լեգեոներների սահմանափակում, ինչի պատճառով Ավետիսյանն այլևս չի կարող խաղալ այդ լիգայում: Խաղաժամանակից չզրկվելու համար Աբովը պետք է տեղափոխվեր գլխավոր թիմ կամ փոխեր ակումբը:
VNews-ին հայտնի է դարձել, որ «Կիշվարդան» դեռ չի ցանկանում պաշտպանին գլխավոր թիմ տեղափոխել, բայց նաև մտադիր չէ վաճառել նրա տրանսֆերային իրավունքը: Որոշվել է հայ ֆուտբոլիստին վարձակալությամբ այլ ակումբ ուղարկել: Ֆուտբոլիստի գործակալը նրա ծառայություններն առաջարկել է VBET Հայաստանի Պրեմիեր լիգայի մի քանի ակումբների, սակայն նրանք առանձնակի հետաքրքրություն չեն ցուցաբերել:
Այժմ Ավետիսյանը կարող է կարիերան շարունակել Սլովակիայի կամ Ռումինիայի երկրորդ դիվիզիոնը ներկայացնող ակումբներից մեկում: Նա համաձայնություն ունի այդ թիմերում փորձաշրջան անցնելու շուրջ: Փորձաշրջանից հետո միայն պարզ կլինի, թե որտեղ է պաշտպանը շարունակելու կարիերան:
Ավետիսյանի և «Կիշվարդայի» միջև պայմանագիրը գործում է մինչև 2023 թվականի ամառը: