Միլանի «Ինտերը» առաջիկա տրանսֆերային պատուհանի ընթացքում պետք է որոշի՝ իր թիրախավորված հարձակվողներից որի տրանսֆերը գնել։ Այս պահին իտալական մամուլն առանձնացրել է 2 թեկնածուի։
Corriere Dello Sport-ը հաղորդում է, որ «ներաձուրիները» միացել են ՌԲ «Լեյպցիգի» առաջատար Տիմո Վերների համար մղվող պայքարին։ «Ինտերի» հիմնական մրցակիցը «Լիվերպուլն» է։ Սակայն նրա տրանսֆերն իրականացնելու համար պետք է մեծ գումար ծախսել։ Դա էլ իր հերթին կարող է գոյանալ Լաուտարո Մարտինեսի վաճառքից հետո։
Նույն աղբյուրի պնդմամբ «Ինտերի» ղեկավարությունն ավելի հակված է Էդինսոն Կավանիին ձեռք բերելու տարբերակին։ Գերմանացի հարձակվողը նոր թիմ ու նոր առաջնություն տեղափոխվելուց հետո, հնարավոր է, ժամանակ պահանջի ադապտացիայի համար, իսկ ուրուգվայցին ժամանակին փայլել է Իտալիայում՝ պաշտպանելով «Պալերմոյի» ու «Նապոլիի» գույները։
