Հոլիվուդյան դերասանուհի Էմբեր Հերդին հաջողվել է պահպանել իր դերն «Aquaman» ֆիլմի շարունակությունում, նրան այդ հարցում օգնել են գլխավոր դերակատար Ջեյսոն Մոմոան և ֆիլմի ռեժիսոր Ջեյմս Ուանը, հայտնում է Daily Mail-ը։
Դերասանուհին մի քանի ամիս շարունակ օրական մի քանի ժամ մարզվել է՝ ֆիլմում նկարահանվելու համար։ Ավելի ուշ զգեստների դիզայները Հերդին ասել է, որ նրա դերը կրճատվել է:
Ավելի վաղ հաղորդվել էր, որ դերասանուհուն «Aquaman 2»-ում ընդամենը 10 րոպե ընդհանուր տևողությամբ դեր է հատկացվել՝ նախկին ամուսնու՝ Ջոնի Դեփի հետ դատավարության հետևանքով:
Սկանդալային գործընթացի պատճառով Դեփի երկրպագուները ստորագրահավաք են կազմակերպել՝ պահանջելով Հերդին հեռացնել «Aquaman»-ի շարունակության դերասանական կազմից։ Փաստաթուղթը հավաքել է ավելի քան 2,3 միլիոն ստորագրություն։ Ավելի ուշ արտասահմանյան լրատվամիջոցները պնդում էին, որ դերասանուհու դերի կրճատման պատճառը Հերդի և Մոմոայի միջև քիմիայի բացակայությունն է։
Բացի այդ, դերասանուհուն չի հաջողվել բարձրացնել ֆիլմի երկրորդ մասում նկարահանվելու վարձատրությունը։ Ֆիլմում իր դերի համար Հերդը կարող էր ստանալ 6 միլիոն դոլար, սակայն նրան վճարել են 2 միլիոն դոլար, ինչպես նշված է նախնական պայմանագրում։