Տիգրան Պետրոսյանի անվան շախմատի տանն այսօր տրվեց Կարեն Ասրյանի 13-րդ հուշամրցաշարի մեկնարկը, որին մասնակցում են 6 երկրների 99 շախմատիստներ: Ընդ որում ռուսաստանցի շախմատիստները հանդես են գալիս ՖԻԴԵ-ի դրոշի ներքո:
Մրցաշարի մասնակից 9 գրոսմայստերներից 7-ը հաղթանակով մեկնարկեց: Շանթ Սարգսյանը հաղթեց Մելիկա Մոհամադիին, Զավեն Անդրիասյանն առավելության հասավ Կարեն Թովմասյանի նկատմամբ, Տիգրան Պետրոսյանը պարտության մատնեց Գագիկ Նավոյանին:
Լևոն Բաբուջյանը, Սամվել Տեր-Սահակյանն ու Ամին Տաբատաբաեին հաղթեցին համապատասխանաբար Ալբերտ Աթոյանին, Հայկ Բոյաջյանին ու Հմայակ Հովհաննիսյանին: Իսկ ահա Հովիկ Հայրապետյանի օգտին մեկ միավոր գրանցվեց առանց մրցախաղի մասնակցելու: Նրա մրցակից Հարություն Տեր-Պետրոսյանը չէր ներկայացել հանդիպմանը: Ընդհանուր առմամբ մեկնարկային տուրում 44 պարտիա արդյունավետ ելք ունեցավ:
Մրցաշարի ամենաբարձր անհատական վարկանիշ ունեցող Հրանտ Մելքումյանը հաշտություն կնքեց Վահե Սուքիասյանի հետ, Մանուել Պետրոսյանն էլ ոչ-ոքի խաղաց Մամիկոն Մարտիրոսյանի հետ: