Vnews-ը շարունակում է պատմել  համաշխարհային կինոպատմության կարևորագույն անունների մասին, առանց որոնց այսօրվա կինեմատոգրաֆի պատկերը չէր լինի այնպիսին, ինչպիսին մենք այն գիտենք։

Ռեժիսոր, պրոդյուսեր, նկարիչ և անիմատոր Ուոլթ Դիսնեյը համաշխարհային անիմացիոն կինոյի ամենահայտնի անունն է: Ֆերմերի որդուց հոլիվուդյան մագնատ դառնալու ճանապարհին հետաքրքիր և յուրօրինակ շատ բան է կատարվել Դիսնեյի հետ։ Այսօր մի փոքր բարդ է խճճված պատմություն ունեցող սուտն ու բամբասանքը տարբերել իրական փաստերից։

• Անիմատորի կենդանիների հանդեպ վառ արտահայտված սերը անհիմն չէ. մանուկ ժամանակ փոքր Ուոլթը որոշում է անտառում բու բռնել։ Երկար չարչարանքից հետո, երբ թռչունը ոչ մի կերպ «չի հանձնվում», տղան սպանում է բուին և հուսահատ վերադառնում տուն` տառապելով խղճի խայթից ու ստացած վերքերից։ Դրանից հետո նա բազմիցս փորձում էր «հարություն տալ» թռչունին իր ֆիլմերում, իսկ արդեն հասուն տարիքում տանը շներ է պահել:

• Ուոլթը մանկուց սիրում էր ժամերով ինքնամոռաց նկարել։ Նրա հայրը համարում էր այդ զբաղմունքն անօգուտ և աննպատակ ժամանակի վատնում, ինչի արդյունքում մեծ քանակով թուղթ էր փչանում։ Մի անգամ նա նույնիսկ բարկանում և պատռում է որդու բոլոր նկարները, ինչից հետո Դիսնեյ կրտսերը փախչում է տնից, կեղծում հոր ստորագրությունը և վարորդ է աշխատում Կարմիր խաչում:

• Առաջին համաշխարհային պատերազմի ժամանակ հնարամիտ Ուոլթ Դիսնեյը գլխի է ընկնում, թե ինչպես կարելի է ֆինանսական օգուտ քաղել ռազմական իրավիճակից։ Իր ընկերոջ հետ նա փնտրում է գերմանական սաղավարտներ, որոնք էլ վաճառում է ամերիկացի զինվորներին։ Տեսնելով, որ փամփուշտների անցքեր ունեցող սաղավարտներն ավելի լավ են վաճառվում, ապագա հոլիվուդյան միլիոնատերը արհեստական անցքեր էր բացում իր գտածների վրա, նորերն էլ կեղտոտում էր ցեխով և արյունով` «կռիվ տեսածի» տեսք տալու համար։

• Ուոլթն ու իր եղբայր Ռոյը 1928-ին բացել էին ապագա մուլտիմեդիալ կայսրությունը, երբ Դիսնեյ ազգանունը հայտնի դարձավ «Վիլլի գնացքի» շնորհիվ։ Այդ ժամանակ ԱՄՆ-ն ճանաչում էր երեք մուլտիպլիկատորի՝ Մաքս Ֆլեյշերին, որը ստեղծեց Պոպայ նավաստուն, Ուոլթեր Լանցին, որը ստեղծեց Վուդի փայտփորիկին, և Դիսնեյին` իր անտրոպոմորֆ կենդանիներով՝ Միքի Մաուսի գլխավորությամբ։

• Դիսնեյը տառապում էր վարակավախով և անընդհատ լվանում էր իր ձեռքերը։ Վերմինոֆոբիայի այս տեսակը նրան ստիպում էր օրը մի քանի ժամ մանրակրկիտ մաքրել մատներն ու ափերը։

• Փայլուն բիզնեսմեն Ուոլթը առատաձեռն չէր և չափազանց քիչ էր վճարում իր աշխատակիցներին։ 1941-ին գրեթե ամբողջ անձնակազմը գործադուլ էր հայտարարել և ստուդիայի դիմաց ցույցի էր դուրս եկել` «Ո՞վ ենք մենք` մարդի՞կ, թե՞ մկներ» և «Դիսնեյ ստուդիա. մեկ հանճար և 700 թզուկներ» պաստառներով։ Ուոլթի եղբայր Ռոյը կարողացավ համաձայնության գալ ցուցարարների հետ և շտկել դրությունը։

• Դիսնեյը շատ խիստ տնօրեն էր և սիրում էր նախատել ալարկոտ գլուխ պահողներին։ Երբ նա քայլում էր միջանցքներով ու հազում մոլի ծխողին հատուկ կրեսչենդոյով, գործընկերներն իրար զգուշացնելու համար ցիտում էին «Բեմբիից» հայտնի «Անտառում մարդ կա՜» մեջբերումը և արագ կորչում Դիսնեյի տեսադաշտից։

• Դիսնեյը տանել չէր կարողանում կոմունիստներին և նախագահ Ռուզվելթին։ Մի առիթով անգամ ասել է՝ «Այս դարը նույնասեռականների, մարմնավաճառների և կոմունիստական ավազակների դար է: Եվ այս վիճակին հասել ենք Ռուզվելթի և աշխատանքային հարաբերությունների պետական հանձնաժողովի պատճառով»: Անգամ իր աշխատակիցների մի մասին մեղադրել է կոմունիստական գաղափարախոսությանը հարելու մեջ:

• «Փինոքիո» մուլտֆիլմի նյույորքյան պրեմիերայի համար Դիսնեյը վարձել էր 11 գաճաճ տղամարդու, որոնց Փինոքիոյի կոստյումներ էին հագցրել և կարգադրել զվարճեցնել հյուրերին։ Սակայն «թզուկները» չարաշահել էին ալկոհոլը, հարբել ու խախտել էթիկայի կաննոները՝ վախեցնելով կանանց և երեխաներին։ Դիսնեյը անհապաղ ոստիկանություն էր կանչել։

• Դիսնեյը գերօրինակելի հայրիկ էր և պաշտում էր իր երեխաներին։ «Դիսնեյլենդ» ստեղծելու միտքը ծնվեց իր մոտ երեխաների հետ զբոսանքի ժամանակ. նա ցանկացավ ստեղծել մի վայր, որտեղ կարելի է հաճելի և ուրախ ժամանակ անցկացնել ամբողջ ընտանիքով։ Սակայն ինվեստորները սկեպտիկորեն էին տրամադրված նմանատիպ զբոսայգու գաղափարին, և անիմատորը ստիպված եղավ ստանալ մերժումներ հարյուրավոր անգամներ, ասում են՝ 302 անգամ։ Այդ ժամանակ նա ներդրեց զբոսայգու ստեղծման մեջ սեփական գումարները և մի տարի հետո ստացավ շուրջ 1 միլիոն այցելու։

• Լեգենդար անիմատորը մահացել է 1966 թվականին՝  65 տարեկանում՝ թոքերի քաղցկեղից։ Դրանից հետո իր անվամբ կոչվող ստուդիայի կողմից ստեղծված անիմացիոն ֆիլմերում երբեք ծխախոտ չի ցուցադրվել։