Դերասանուհի Կատրին Դենյովն առաջին անգամ հայտնվեց կինոէկրաններին 1957 թվականին։ Անցած տասնամյակների ընթացքում նա հասցրել է խաղալ բազմաթիվ ֆիլմերում, մեկ անգամ առաջադրվել է «Օսկարի», ստացել 42 այլ մրցանակ և դարձել ամբողջ աշխարհի հեռուստադիտողների սիրելին։ Պատանեկության տարիներին, սակայն, նա ընդհանրապես չէր երազում փառքի մասին, իսկ կարիերայի սկզբում գրեթե մնացել էր ավագ քրոջ ստվերում։

VNews-ն ուսումնասիրել է Կատրին Դենյովի կենսագրությունը՝ նրա ծննդյան պահից մինչև մեր օրերը։ Պարզվում է, որ էկրանային աստղի անձնական կյանքում և կարիերայում կտրուկ շրջադարձեր են եղել։ Նրա ճանապարհը մեկ անգամ չէ, որ հատվել է կինոյի և նորաձևության այլ լեգենդների հետ:

• Կատրին Դենյովը ծնվել է 1943 թվականին՝ Մորիս Դորլեակի և Ռենե Սիմոնոյի ընտանիքում։ Նրա երկու ծնողներն էլ դերասաններ են եղել․ հայրը շատ է նկարահանվել ֆիլմերում, բայց մայրը հիմնականում փայլել է թատրոնի բեմում։
• Սկզբում Կատրինին չէր հետաքրքրում կարիերան ֆիլմերում։ Դերասանական դինաստիան առաջինը որոշեցին շարունակել նրա ավագ քույրը՝ Ֆրանսուա Դորլեակը (նա բեմ ելավ 10 տարեկանում) և կրտսեր Սիլվիան, որն 8 տարեկանում էկրանին հայտնվեց ոչ մեծ դերով։
• Կատրինը դեմ չէր գրպանի փող աշխատելուն, ուստի նույնպես սկսեց նկարահանվել։ Նա իր դեբյուտը կինոյում կատարել է 13 տարեկանում՝ նկարահանվելով Սիլվիայի հետ նույն ֆիլմում։

Կատրին Դենյով (1961)

• Սիլվիայի կարիերան շուտով մարեց, իսկ Ֆրանսուազն ու Կատրինը շարունակեցին նկարահանվել։ Իր բեմական անվան համար Ֆրանսուազն արդեն ընդունել էր Դորլեակ ազգանունը, ուստի նրա ծնողները համոզեցին Կատրինին որպես կեղծանուն ընդունել մոր օրիորդական անունը։ Կատրինը չէր մտածում, որ իր ամբողջ կյանքը կնվիրի կինոյին, ուստի համաձայնեց, ինչի համար մինչ օրս ափսոսում է։ Նրա կարծիքով՝ Դենյով անունը դժվար է արտասանել։

Կատրին Դենյովը (աջից) և նրա քույրը՝ Ֆրանսուա Դորլեակը (1967)

• 1961 թվականին 17-ամյա Կատրինը սկսեց հանդիպել ռեժիսոր Ռոջեր Վադիմի հետ։ 2 տարի անց նա նրանից որդի ունեցավ, որին անվանեցին Քրիստիան։ Երբ երեխան ծնվեց, նրա հայրը, որին խելահեղ սիրահարված էր Կատրինը, ամուսնության առաջարկ արեց։ Բայց նա անխղճորեն հրաժարվեց, քանի որ կարծում էր՝ Ռոջերը ցանկանում է ամուսնանալ միայն հասարակական կարծիքի պատճառով, այլ ոչ թե սիրո համար:
• Վադիմի և Դենյովի որդին նույնպես հետագայում դարձավ դերասան և մոր հետ նկարահանվեց մի քանի ֆիլմերում:
• Ավելի ուշ Ռոջերը Կատրինին և երկու այլ հայտնի դերասանուհիների, որոնց հետ հարաբերությունների մեջ էր, նվիրեց մի գիրք, որը կոչվում էր «Բարդո, Դենյով, Ֆոնդա. Իմ կյանքն աշխարհի երեք ամենագեղեցիկ կանանց հետ»:

Կատրին Դենյովը և որդին՝ Քրիստիան Վադիմը, նրա հարսանիքին (1996 թ.):

• Կատրինի կյանքը փոխվեց ռեժիսոր Ժակ Դեմիի հետ ծանոթանալուց հետո։ Հենց նրա շնորհիվ Կատրինը սկսեց ավելի լուրջ վերաբերել դերասանական կարիերային։ Նա դերասանուհուն առաջարկեց խաղալ «Շերբուրգի հովանոցները» (1964) ֆիլմում, որը նրա առաջընթացն էր։ Ռեժիսորի հետ հանդիպման ժամանակ Դենյովը հղի էր, բայց հանուն նրա Դեմին համաձայնեց հետաձգել նկարահանումները մինչև երեխայի ծնունդը։
• Հետաքրքիր է, որ այդ ֆիլմում Կատրինը մարմնավորել է կնոջ, որը հղիացել է մի տղամարդուց, որի հետ չէր կարող միասին լինել։ Այդպիսով, դերասանուհին կրկնել է իր հերոսուհու ճակատագիրը։

Կատրին Դենյովը «Շերբուրգի հովանոցները» ֆիլմում (1964)

• Կատրինի կարիերան հասավ միջազգային ասպարեզ, երբ նա նկարահանվեց բրիտանական «Վերադարձ» (1965) ֆիլմում։ Նկարահանումները տեղի ունեցան Լոնդոնում։ Այնտեղ դերասանուհին հանդիպեց տեղի նորաձևության լուսանկարիչ Դեյվիդ Բեյլիին։ Նրանք շուտով ամուսնացան, բայց 1972-ին բաժանվեցին։ Զույգը երեխա չուներ։
• Կատրինն այլևս երբեք նորից չամուսնացավ։ Նրան վերագրում են ամուսնության հետ կապված տարբեր մեջբերումներ։ Ահա դրանցից մեկը. «Ամուսնության մեջ իմաստ չեմ տեսնում, չէ՞ որ գոյություն ունեն ամուսնալուծություններ»։

Կատրին Դենյով և Դեյվիդ Բեյլի (1965)

• 22 տարեկանում Դենյովը պետք է հանդիպեր Մեծ Բրիտանիայի թագուհուն։ Դերասանուհին որոշեց, որ մոդելավորող Իվ Սեն Լորանը պետք է ընտրի իր հանդերձանքն այդ միջոցառման համար, իսկ հետո խնդրեց նրան կերպարներ ստեղծել ֆիլմերից մեկում իր հերոսի համար։ Դրանից սկսվեց նրանց երկարատև բարեկամությունը։ Սեն Լորանը պատմել է, որ հաճախ է նամակ գրում դերասանուհուն և նրան անվանում «իմ սիրելի Կատրին»։

Կատրին Դենյով և Իվ Սեն Լորան (1992)

• 1967 թվականին Դենյովը նկարահանվում է Դեմիի մեկ այլ ֆիլմում՝ «Աղջիկները Ռոշֆորից»։ Նա իր քրոջ՝ Ֆրանսուազի հետ միասին էկրանին քույրերի դեր է խաղացել։
• Նույն թվականին Ֆրանսուան ողբերգորեն մահացավ ավտովթարից։ Այդ իրադարձությունը լուրջ հարված էր Կատրինի համար։ Չնայած կերպարների տարբերությանը, նա և քույրը շատ մտերիմ էին։ Կատրինը Ֆրանսուազին համարում էր իր լավագույն ընկերուհին։

Կատրին Դենյովը և Ֆրանսուազ Դորլեակն «Աղջիկները Ռոշֆորից» ֆիլմում (1967)

• 1968 թվականից Կատրինը հանդիպում էր ռեժիսոր Ֆրանսուա Տրյուֆոյի հետ, որի ֆիլմում այն ժամանակ նկարահանվում էր։ Այդ ժամանակ Տրյուֆոն իրեն անվանում էր մոլորակի ամենաերջանիկ մարդը։ 1970-ին նրանք բաժանվեցին, և Տրյուֆոն դժվար տարավ բաժանումը։
• Դեյվիդ Բեյլիից բաժանվելուց հետո Կատրինը հարաբերություններ սկսեց ամուսնացած դերասան Մարչելո Մաստրոյանիի հետ։ 1972 թվականին ծնվեց նրանց դուստրը՝ Կիարան։ Ըստ լուրերի՝ Մարչելոյի կինն առաջարկել է որդեգրել աղջկան, սակայն Կատրինը մերժել է նրան։ Կիարան գնաց մոր հետքերով և դերասանուհի դարձավ։ Նրանք միասին նկարահանվել են մի քանի ֆիլմերում։

Կատրին Դենյովը դստեր՝ Կիարա Մաստրոյանիի հետ (2014 թ.)

• 70-ականներին Դենյովը դարձավ Chanel No. 5-ի դեմքը։ Նրանից հետո այս օծանելիքի գովազդում նկարահանվել են բազմաթիվ այլ հայտնի դերասանուհիներ, այդ թվում՝ Նիկոլ Քիդմանը։
• 1970 թվականին էկրան բարձրացավ «Ավանակի կաշին» ֆիլմը՝ համանուն հեքիաթի կինոադապտացիան։ Կատրինը դրանում մարմնավորում էր արքայադստեր, թեև ռեժիսորն ի սկզբանե նախատեսում էր Բրիջիթ Բարդոյին տալ այդ դերը։

• 1985 թվականին Դենյովը եղել է Մարիաննայի կիսանդրու բնորդուհին, որը Ֆրանսիայի կարևոր խորհրդանիշն է: Նախորդ տարիներին Մարիաննայի նախատիպերը դարձան դերասանուհի Բրիջիթ Բարդոն և երգչուհի Միրեյ Մատյեն։

Կատրին Դենյովը և Մարիաննայի կիսանդրին (1985)

• 1986 թվականին Դենյովը թողարկեց անվանական օծանելիք։ Այն արժանացավ FiFi Awards մրցանակի։
• Չնայած հեղինակությանը, Կատրինը պետք է համառեր իր ուզած դերը ստանալու համար: Մի քանի տարի շարունակ նա գրում էր ռեժիսոր Լարս ֆոն Թրիերին գործակցության առաջարկներով՝ նախքան նրա «Մթության մեջ պարողը» (2000) ֆիլմում դեր խաղալը:

Կատրին Դենյովը «Մթության մեջ պարողը» ֆիլմում (2000)

• Կատրին Դենյովն, անկասկած, ոճի խորհրդանիշ է: Նորաձև հագուստից ավելի նա սիրում է նորաձև կոշիկներ։ Մի քանի տարի առաջ նա աճուրդ է անցկացրել, որտեղ վաճառել է կոշիկների իր հավաքածուն, իսկ հասույթը տրամադրել բարեգործությանը:
• Դերասանուհին ինքնակենսագրական է թողարկել իր օրագրերի հիման վրա։ Դրանում նա ներկայացրել է մի քանի խորհրդանշական ֆիլմերի նկարահանումների պատմությունները, այդ թվում՝ «Տրիստան» (1970թ.) և «Մթության մեջ պարողը» (2000թ.):
• Կատրինի ամենամոտ ընկերներից մեկը դերասան Ժերար Դեպարդյեն է։ Նրանք շփվում են ավելի քան 30 տարի և միասին նկարահանվել են 10 ֆիլմում։
• Դերասանուհին դաջվածքներ ունի ոտքին և մեջքին։

• 2019 թվականին Դենյովը կաթվածի պատճառով հոսպիտալացվել է ֆիլմի նկարահանումների ժամանակ։ Պաշտոնական հայտարարությունների համաձայն՝ դա ոչ մի կերպ չի ազդել նրա շարժողական ֆունկցիաների վրա։ Ավելի ուշ աստղը կարողացել է վերադառնալ աշխատանքի։
• Դերասանուհին շարունակում է ակտիվ նկարահանվել։ 2023 թվականին էկրաններին կհայտնվի ևս մեկ ֆիլմ, որում նա գլխավոր դերակատարն է։