Մարտի 19-ից-21-ը Երևան քաղաքի ՀՊՏՀ մարզադահլիճում կայացել է Հայաստանի վոլեյբոլի ֆեդերացիայի 2021 թվականի գավաթի խաղարկությունը, որին մասնակցել են չորսական թիմեր:
Կանանց պայքարում բոլոր չորս թիմերը՝ ԽՄՕՄՄ-ը, «Վանը», ԲՊՀ-ը և «Ավանը», պայքարեցին մրցանակային բարձր տեղերի համար, բայց ի վերջո ավելի ուժեղ գտնվեց ԽՄՕՄՄ թիմը՝ հաղթելով իր բոլոր մրցակիցներին: Երկրորդ տեղը գրավեց «Վան» թիմը, երրորդը դարձավ ԲՊՀ-ն, իսկ չորրորդը՝ «Ավանը»: Գավաթի խաղարկության կանանց պայքարում լավագույն մարզիկներ ճանաչվեցին Վերոնիկա Կոշկարյանը (ԽՄՕՄՄ), Աննա Գալուտյանը («Վան») և Սոնա Սահակյանը (ԲՊՀ):
Տղամարդկանց պայքարում ՀՎՖ գավաթին տիրանալու համար հիմնական հավակնորդներն էին համարվում ՖԻՄԱ և ԽՄՕՄՄ թիմերը, որոնց հանդիպումը կայացավ մարտի 20-ին: Հանդիպումը ստացվեց շատ լարված և հետաքրքիր: ԽՄՕՄՄ թիմը համալրված էր երիտասարդ և խոստումնալից մարզիկներով, սակայն ավելի փորձառու ՖԻՄԱ թիմի մարզիկները կարողացան հաջողության հասնել ԽՄՕՄՄ թիմի նկատմամբ 3:1 հաշվով: Տղամարդկանց գավաթի խաղարկությունում երրորդ տեղ գարավեց ՃՇՀԱՀ, իսկ չորրորդ տեղ`«Գյումրին»: Տղամարդկանց պայքարում լավագույն մարզիկներ ճանաչվեցին՝ Վահե Նազարյանը (ԽՄՕՄՄ), Անդրէ Սիմոնին (ՃՇՀԱՀ) և գավաթակիր թիմից՝ Արման Միսկարյանը:
Արդեն մեկնարկել է վոլեյբոլի տղամարդկանց 2021 թվականի առաջնությունը և կայացել է վիճակահանությունը: ՀՎՖ որոշմամբ՝ վոլեյբոլի տղամարդկանց առաջնությունը անցկացվելու է նոր ֆորմատով՝ապրիլ-հունիս և սեպտեմբեր-նոյեմբեր ամիսներին՝չորս փուլերով: Թիմերը հանդես են գալու մեկնումներով համակարգով, յուրաքանչյուր շաբաթ և կիրակի օրերին անցկացվելու է ռեգուլյար առաջնության փուլերը: Նույն ֆորմատը գործելու է նաև կանանց Հայաստանի առաջնության համար:
Ներկայացնում ենք մեր ֆոտոլրագրող Գրիգոր Գրիգորյանի ֆոտոշարքը եզրափակիչ հանդիպումներից.
- 34