Հայաստանի սուսերամարտի ֆեդերացիայի երկարամյա ղեկավար Արմեն Գրիգորյանը վերընտրվել է այդ կազմակերպության նախագահի պաշտոնում։ Ընտրությունը տեղի է ունեցել Երևանում անցկացված ՀՍՖ-ի հաշվետու-ընտրական կոնֆերանսում՝ հաղորդում է ՀԱՕԿ-ի պաշտոնական կայքը։
Ելույթ ունեցողներն արձանագրել են, որ մեր երկրում այդ մարզաձևի ընդհանուր վիճակն աստիճանաբար բարելավվում է: Մարզիկներն ապահովված են մարզագույքով, հանդերձանքով, իսկ հավաքական թիմերը պարբերաբար մասնակցում են միջազգային մրցաշարերի, Եվրոպայի ու աշխարհի առաջնությունների:
Նշվել է, որ առաջընթացի գործում զգալի դեր ունի մարզաձևի հանրապետական ֆեդերացիայի լավ աշխատանքը: Կառույցն ամուր կապեր ունի եվրոպական և միջազգային ֆեդերացիաների հետ: Հենց այդ ամենից ելնելով էլ՝ ներկաները միաձայն ֆեդերացիայի նախագահ են վերընտրել Արմեն Գրիգորյանին:
ՀՍՖ-ի փոխնախագահներ են ընտրվել Սամվել Աբրահամյանը և Հրանտ Ավանեսյանը, գործադիր տնօրեն՝ Նատալյա Բունիաթյանը, գլխավոր քարտուղար՝ Արթուր Սեդրակյանը, գլխավոր մարզիչներ՝ Գագիկ Հովհաննիսյանը (ճկասուսեր) և Արմեն Նավասարդյանը (խոցասուսեր)։
