Հուլիսի 17-ին Լիբանանի մայրաքաղաք Բեյրութում՝ «Մետրոպոլիս Էմփայեր Սոֆիլ» կինոթատրոնում, կայացել է «Կիլիկիա. Առյուծների երկիր»/“Cilicia: The Land of Lions” երեք պատմական ֆիլմ-ակնարկների փակ դիտումը: Գաղափար-նախաձեռնությունը կյանքի է կոչվել «ԳՈՀԱՐ» սիմֆոնիկ նվագախմբի և երգչախմբի հիմնադիր՝ Խաչատուրյան ընտանիքի, մասնավորապես լիբանանահայ բարերար Հարութ Խաչատուրյանի աջակցությամբ: Միտված լինելով ամբողջ աշխարհում պրոպագանդել և սերունդներին հասանելի դարձնել հայկական երաժշտությունն ու մշակույթը ՝ «ԳՈՀԱՐ»-ն այս այգամ անդրադարձ է կատարել կինոյին՝ ներկայացնելով հայ ժողովրդի պատմական
էջերից մեկը՝ Կիլիկիայի հպարտ հայոց թագավորությունը: Ֆիլմի ռեժիսորը Աշոտ Առաքելյանն է։
Երեք ֆիլմ-ակնարկներն ամփոփ, գեղարվեստական մոտեցմամբ,ներկայացնում են Կիլիկիայի հզորագույն թագավորական դինաստիաների 300-ամյա պատմությունը:
Ֆիլմ-ակնարկները նկարահանվել են հայաստանյան «Դոմինո Փրոդաքշն» ընկերության կողմից: Այստեղ առավելագույնս պահպանված է պատմական հավաստիությունը, սակայն, թեմայի մատուցման գեղարվեստական և դրամատուրգիական մասն ապահովելու նպատակով կան պատմական դրվագներ, որոնք ներկայացվել են ռեժիսորի յուրահատուկ ստեղծագործ լուծումներով: Ֆիլմի ստեղծագործական կազմն արել է ամեն ինչ ներկայացվող կինոդիտողին ֆիլմում նկարագրվող ժամանակաշրջան տեղափոխելու համար:
Ձևավորվելով մի ժամանակաշրջանում, երբ հայ ժողովուրդը չուներ պետականություն, Միջերկրական ծովի ափին՝ Կիլիկիայի հողում, ստեղծվեց նոր հայկական իշխանապետություն, որն իր երեքդարյա պատմության ընթացքում կարողացավ պահպանել իր անկախությունը և հիմնել հզոր թագավորություն։
Առաջին ֆիլմ-ակնարկ՝
Այն ներկայացնում է Կիլիկիայի պատմությունը՝ հիմնադրման օրվանից մինչև ամենաազդեցիկ թագավորներից մեկի` Ռուբինյանների տոհմից սերող Լևոն Մեծագործի գահակալումը:
Երկրորդ ֆիլմ-ակնարկ՝
Այստեղ կծանոթանանք 13-րդ դարի իրադարձություններին, կտեսնենք Լևոն I թագավորի դուստր Զաբելի, նրա խնամակալ Կոնստանդին Պայլի և Զաբելի ամուսին՝ Հեթումյանների դինաստիայի հիմնադիր Կիլիկիո թագավոր Հեթումի կերպարները։
Երրորդ ֆիլմ-ակնարկ՝
1219-1375 թթ․ պատմությունը ներկայացնում է Լևոն III-ի գահակալման տարիները, չորս կողմից կեղեքվող Կիլիկիան և վերջին թագավոր Լևոն V Լուսինյանին, որի հուղարկավորությամբ էլ ավարտվում է ֆիլմ-ակնարկը։
Մոտ ապագայում ֆիլմ-ակնարկների պրեմիերան տեղի կունենա նաև Հայաստանում։