«Լիվերպուլը» մտադիր է ձեռք բերել «Լեյպցիգի» գոլահար Տիմո Վերների տրանսֆերը։ Ֆուտբոլիստի ծառայություններով հետաքրքրված է մերսիսայդյան ակումբի գլխավոր մարզիչ Յուրգեն Կլոպը՝ հաղորդում է գերմանական Bild-ը։
Մասնագետն անձամբ հանդիպում է նախատեսել 24-ամյա հարձակվողի հետ։ Հանդիպման ընթացքում Կլոպը ցանկանում է Վերներին ներկայացնել «Լիվերպուլի» հետագա ծրագրերը, ֆուտբոլիստի ակնկալվող նշանակությունն անգլիական ակումբի կազմում։
Նշվում է, որ Կլոպը սովորաբար այսպիսի հանդիպումներ է կազմակերպում այն ֆուտբոլիստների հետ, որոնց իսկապես ցանկանում է տեսնել իր թիմում։
Միաժամանակ հաղորդվում է, որ Կլոպի ու Վերների հանդիպումն այս պահին նախատեսված չէ՝ կորոնավիրուսի պատճառով ստեղծված իրավիճակում անվտանգության նկատառումներից ելնելով։
Վերների ծառայություններով հետաքրքրված է նաև Մյունխենի «Բավարիան»։
Բունդեսլիգայի ընթացիկ մրցաշրջանում գերմանացին մասնակցել է 25 հանդիպման՝ դառնալով 21 գոլի և 7 արդյունավետ փոխանցման հեղինակ։