«Կումայրի» ֆուտբոլային ակումբն ՈՒԵՖԱ-ի գործադիր կոմիտեի ընտրության արդյունքներով արծաթե մրցանակի է արժանացել այդ կազմակերպության «Grassroots Awards 2021» մրցանակաբաշխության «Լավագույն սիրողական ակումբ» անվանակարգում՝ տեղեկացնում է ՀՖՖ պաշտոնական կայքը։
Նշվում է, որ ակումբը գործունեություն է ծավալում Շիրակի մարզի 20 համայնքներում՝ ֆուտբոլին առնչվելու հնարավորություն տալով փախստականների ընտանիքների, հաշմանդամություն ունեցող և մանկատների շուրջ 250 երեխաների։
«Կումայրին» ակտիվորեն համագործակցում է հանրակրթական դպրոցների հետ, կազմակերպում համատեղ ֆուտբոլային միջոցառումներ։
«UEFA Grassroots Awards» մրցանակաբաշխությունն անցկացվում է 2010 թվականից։ Այն միտված է խրախուսելու ներառական օրակարգ ունեցող սիրողական ակումբին, որը նպաստում է մասսայական ֆուտբոլի զարգացմանը։