«Բավարիայի» ռմբարկու Ռոբերտ Լևանդովսկիի գործակալ Պինի Զահավին հերթական անգամ հայտարարել է, որ լեհ հարձակվողը ցանկանում է հեռանալ մյունխենյան ակումբից:
ԻՆՉ Է ԱՍՎԵԼ
«Լևանդովսկիի համար «Բավարիան» պատմություն է,- ինսայդեր Ֆաբրիցիո Ռոմանոյի հաղորդմամբ՝ ասել է ֆուտբոլիստի գործակալ Պինի Զահավին: - Նա ուզում է հեռանալ ամռանը: Ոչ ոք չի մտածում փողի մասին: Ճշմարտությունն այն է, որ վերջին ամիսներին Լևանդովսկին այնքան էլ չի զգում ղեկավարության հարգանքը:
Նա ցանկանում է իրականություն դարձնել իր երազանքը: Այո՛, «Բավարիան» կարող է ևս մեկ տարի պահել նրան, բայց դա քայլ է, որը ես խորհուրդ չեմ տա»:
ԻՆՉ Է ԱՍՈՒՄ «ԲԱՎԱՐԻԱՆ»
Մյունխենյան ակումբը ցանկանում է, որ Լևանդովսկին կատարի իր պայմանագրային պարտավորությունները, այն է՝ թիմում ելույթ ունենա մինչև 2022/23 մրցաշրջանի ավարտը:
«Բավարիան» իր այս դիրքորոշումն արտահայտել է բազմիցս՝ մարզական տնօրենի, գլխավոր գործադիր տնօրենի մակարդակով:
ՈՐՏԵՂ ԿԱՐՈՂ Է ԿԱՐԻԵՐԱՆ ՇԱՐՈՒՆԱԿԵԼ ԼԵՎԱՆ
Միջազգային բազմաթիվ լրատվամիջոցների հաղորդմամբ՝ Ռոբերտ Լևանդովսկին բանակցություններ է վարում միմիայն «Բարսելոնայի» հետ:
Կատալոնական ակումբը միակն է, որտեղ լեհ հարձակվողը ցանկանում է ելույթ ունենալ:
