Ամերիկյան ֆուտբոլի «Լոս Անջելես Ռեմս» ակումբը, Ֆուտբոլի ազգային լիգայի եզրափակիչ խաղում համառ պայքարում հաղթելով «Ցինցինատի Բենգալսին», իր պատմության մեջ երկրորդ անգամ դարձել է Սուպերբոուլի հաղթող։
Ինգլվուդ քաղաքի (Կալիֆորնիա նահանգ) SoFi Stadium մարզադաշտում կայացած մրցավեճում «Ռեմսը» չորս քառորդների հանրագումարում հաղթել է 23։20 հաշվով։ Վերջին քառորդից առաջ «Բենգալսն» առջևում էր 20։16 հաշվով, սակայն մրցակիցը կարողացավ այդ քառորդը շահել 7:0 արդյունքով և իր օգտին ավարտել չեմպիոնության համար խաղը։
Մինչև այդ «Լոս Անջելես Ռեմսը» Սուպերբոուլի հաղթող էր դարձել 1999 թվականին, իսկ «Բենգալսը» երրորդ անգամ էր հասել եզրափակիչ. նախորդ երկու փորձերը նույնպես անհաջող են եղել։
Վերջին 2 տարիներին առաջին անգամ Սուպերբոուլին ներկա էին առավելագույն թվով՝ 70 հազար երկրպագուներ։ Ընդմիջմանը տեղի է ունեցել ավանդական Halftime Show-ն, որի ընթացքում մարզասերներին զվարճացրել են հայտնի խմբեր և կատարողներ՝ Eminem-ը, Dr. Dre-ն, Snoop Dogg-ը, 50 Cent-ը, Mary J. Blige-ը և Kendrick Lamar-ը։
- Տեսանյութը դիտելու համար սեղմեք YouTube վիդեոհարթակ տանող հղումի վրա
Խաղին ներկա էր նաև բասկետբոլի «Լոս Անջելես Լեյքերս» ակումբի գերաստղ Լեբրոն Ջեյմսը, որը կրքոտ պար է կատարել 50 Cent-ի ելույթի ժամանակ։
LeBron during the halftime show living his best life 😂 pic.twitter.com/WgTpAO1EmY
— Complex Sports (@ComplexSports) February 14, 2022
Անցյալ տարի առաջնության հաղթող էր դարձել «Տամպա-Բեյ Բականիրսը», որը Սուպերբոուլում 31։9 հաշվով գերազանցել էր «Կանզաս-Սիթի Չիֆսին»։