Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ:
Ձեր ուշադրությանն ենք մայիսի 23-ի իրադարձությունների քրոնիկոնը:
- Սլովակիայում կայացել է տեղի Մ-17 հավաքականի և Հայաստանի հասակակից ընտրանու միջև առաջին ընկերական խաղը: Մեր ընտրանին պարտություն է կրել 1-5 հաշվով: Հայաստանի հավաքականից միակ գոլը հեղինակել է Ժիրայր Շաղոյանը: Տիգրան Առաքելյանի սաները նույն մրցակցի հետ ևս մեկ խաղ կանցկացնեն մայիսի 25-ին:
- Պաշտոնական. Ֆրանսահայ մասնագետ Միշել Տեր-Զաքարյանը նշանակվել է Ֆրանսիայի Լիգա-1-ի «Մոնպելյե» թիմի գլխավոր մարզիչ: Տեր-Զաքարյանի վերջին աշխատավայրը երկրի 2-րդ դիվիզիոնում հանդես եկող «Ռեյմսն» էր:
- The Salt Lake Tribune. Յուրա Մովսիսյանը դժգոհ է իր կարգավիճակից ամերիկյան «Ռեալ Սոլթ Լեյքում»: Ըստ պարբերականի՝ պատճառն այն է, որ մարզչի փոփոխությունից հետո Յուրան ավելի քիչ խաղաժամանակ է ստանում: Մասնավորապես, Մովսիսյանը թիմի վերջին խաղում փոխարինվել է հենց ընդմիջմանը, ինչից հիասթափված է եղել: Այդուհանդերձ, 29-ամյա հարձակվողը մտադիր է ապացուցել մարզչին, որ արժանի է լինելու հիմնական կազմում:
- Արաս Օզբիլիս, Twitter. «Մեր մտքերը Մանչեսթերում են… Հաջողություն «Այաքսին» Եվրոպայի լիգայի եզրափակչում: Հուսով եմ՝ հաշիվը կլինի այնպիսին, ինչպիսին «Օլդ Թրաֆորդում» կայացած վերջին խաղում («Այաքսը» հաղթել էր 2-1 հաշվով, Օզբիլիսը՝ դարձել գոլի հեղինակ)»:
- Ուզբեկստանի գավաթի խաղարկության 1/8 եզրափակչի առաջին խաղում «Կիզիլկումը» մրցակցի հարկի տակ 0-5 հաշվով պարտություն է կրել «Լոկոմոտիվից»: Արթուր Գևորգյանը մասնակցել է ամբողջ խաղին: Պատասխան հանդիպումը կայանալու է մայիսի 30-ին:
- Ստոկհոլմում VivaroNews.am-ի անձնակազմը ծավալուն հարցազրույց է անցկացրել Հայաստանի հավաքականի նախկին ֆուտբոլիստ Լևոն Պաչաջյանի հետ:
- Ստոկհոլմում գտնվող VivaroNews.am-ի թղթակից Ռոբերտ Գասպարյանը հարցազրույց է անցկացրել Sky Sport Italia-ի լրագրող և վերլուծաբան Անդրեա Պավենտիի հետ:
- VivaroNews.am-ը Հայաստանի գավաթի խաղարկության եզրափակիչ՝ «Փյունիկ» – «Շիրակ» հանդիպմանն ընդառաջ ներկայացրել է հանդիպման մասնակիցների գավաթային այցեքարտերը:
