Իսրայելի Էյլաթ քաղաքում ընթանում է ծանրամարտի մինչև 23 տարեկանների Եվրոպայի առաջնությունը:
Այս տարիքային խմբում Հայաստանը ներկայացել է 8 ծանրորդով (Իզաբելլա Յայլյան 58կգ, Սմբատ Մարգարյան 56 կգ, Գևորգ Բաղդասարյան 62 կգ, Ռազմիկ Օլտեցյան 77 կգ,Կարուշ Ղուկասյան 94 կգ, Միքայել Միքայելյան 94 կգ, Մկրտիչ Մկրտչյան 105 կգ):
Դեկտեմբերի 5-ին մրցահարթակ դուրս եկավ 2009 թվականի Եվրոպայի պատանեկան առաջնության չեմպիոն, նույն թվականի Եվրոպայի Մ23 տարեկանների ոսկե մեդալակիր Սմբատ Մարգարյանը, որի համար ամեն ինչ այդքան էլ հաջող չդասավորվեց: 56կգ քաշային կարգում Մարգարյանը մրցակցեց 8 ծանրորդների հետ, սակայն, ցավոք, գրանցեց վատագույն 2-րդ արդյունքը և 6 մոտեցումներից կարողացավ հաջողությամբ կատարել միայն երկուսը ու ավարտեց ելույթը երկամարտի 226 կգ արդյունքով:
Մ23 տարեկաններից հաջորդը իր ուժերը փորձեց 62 կգ քաշային կարգում հանդես եկող Գևորգ Բաղդասարյանը, որը պոկում վարժությունում կարողացավ բարձրացնել միայն 110 կգ ծանրաձողը, հրում վարժությունում էլ Գևորգը միայն 2-րդ մոտեցումից հետո կարողացավ հրել 145 կգ, սակայն 3-րդ ՝ 154 կգ մոտեցումը, հայ ծանրորդը ձախողեց: Գևորգ Բաղդասարյանը երկամարտի 255 կգ արդյունքով տեղ գտավ վերջին հորիզոնականում: