Մադրիդի դատարանը երկրորդ անգամ է արդարացրել Իսպանիայի հավաքականի նախկին կիսապաշտպան Խաբի Ալոնսոյին, որը ներկայումս մարզչական գործունեություն է ծավալում «Ռեալ Սոսյեդադ Բ»-ում: Աշխարհի և Եվրոպայի չեմպիոնն անմեղ է ճանաչվել Իսպանիայի հարկային օրենքները խախտելու գործով: Այս մասին հաղորդում է Onda Cero-ն:
Ըստ աղբյուրի տեղեկության՝ դատախազությունն Ալոնսոյի համար պահանջել է 2,5 տարվա ազատազրկում 2010, 2011 ու 2012 թվականներին գրանցված 3 խախտումների համար: Սակայն դատարանը գտել է, որ նախկին ֆուտբոլիստն օրենքի խախտում թույլ չի տվել:
Ալոնսոն իր մարզական կարիերան սկսել է «Ռեալ Սոսյեդադում»: Նա Սան Սեբաստիանը ներկայացնող ակումբում 1999-2004թթ․ ընկած ժամանակահատվածում մասնակցել է ավելի քան 100 մրցավեճի, ինչից հետո ելույթները շարունակել «Էյբարում»: «Սոսյեդադին» 2002/03թթ․ մրցաշրջանում հաջողվել է դառնալ Իսպանիայի փոխչեմպիոն:
Իսպանացին իր կարիերայի ընթացքում հանդես է եկել նաև «Լիվերպուլում», Մադրիդի «Ռեալում» և «Բավարիայում»: Նա աշխարհի չեմպիոն է, Եվրոպայի կրկնակի չեմպիոն, 2 անգամ հաղթել է Չեմպիոնների լիգայի գավաթի խաղարկությունում: Ալոնսո-ֆուտբոլիստը, ընդհանուր առմամբ, նվաճել է 18 տիտղոս:
Նա 2018/19թթ․ մրցաշրջանում մարզել է «Ռեալի»՝ մինչև 14 տարեկան ֆուտբոլիստներից բաղկացած թիմը:
Ալոնսո․ «Գնացի «Բավարիա», որպեսզի բացահայտեմ Գվարդիոլայի գաղտնիքները»