«Մանչեսթեր Սիթին» մտադիր է շտապ կերպով իրականացնել «Լեսթերի» կիսապաշտպան Ռիյադ Մահրեզի տրանսֆերը:
Ինչպես հաղորդում է The Telegraph-ը, «քաղաքայինները» 26-ամյա ֆուտբոլիստի տեղափոխության համար արդեն առաջարկել են 60 մլն ֆունտ, սակայն «Լեսթերը» պատասխանել է մերժումով: Վերջինս այս գործարքից ցանկանում է ստանալ ավելի քան 90 մլն ֆունտ:
Պրեմիեր լիգայի ընթացիկ առաջնության առաջատարը պետք է հասցնի գործարքն իրականություն դարձնել մինչ տրանսֆերային պատուհանի փակումը:
Պեպ Գվարդիոլան հենց Մահրեզին է տեսնում որպես փոխարինող կիսապաշտպան Լերոյ Սանեին, ով շարքից դուրս է մնացել մոտ 6 շաբաթով:
Հիշեցնենք՝ «Մանչեսթեր Սիթին» այսօր հայտարարել էր Բիլբաոյի «Ատլետիկի» պաշտպան Այմերիկ Լապորտի հետ պայմանագիր ստորագրելու մասին:
