Հունաստանը ներկայացնող աշխարհի 8-րդ ռակետ Մարիա Սակարին թեպետ ընդհանուր առմամբ անհաջող մասնակցեց Մելբուրնում ավարտին մոտեցող Ավստրալիայի բաց առաջնությանը, սակայն դրական լիցքերով է վերադառնում հեռավոր ուղևորությունից։
Նա չափազանց շահավետ գովազդային պայմանագիր է կնքել՝ դառնալով Dior նորաձևության տան դեմքը։ 26-ամյա մարզուհին անձամբ է ներկայացրել իր համար ուրախալի այդ տեղեկությունն Ինստագրամում։
Նա, մասնավորապես, գրել է. «Ինձ համար մեծ պատիվ է դառնալ Dior-ի պես հեղինակավոր նորաձևության տան մասնիկը։ Դա իրոք առավելություն է, ու անչափ երջանիկ եմ համագործակցելու մի ապրանքանիշի հետ, որը հեղափոխություն է կատարել կանանց նորաձևության աշխարհում»։
Ավստրալիայի այս տարվա բաց առաջնությունում Սակարին ելույթներն ավարտեց արդեն չորրորդ շրջանում։ 2021-ին նա հասել էր «Ռոլան Գարոսի» և ԱՄՆ բաց առաջնության կանանց մենախաղի կիսաեզրափակիչ։