Առաջնության նախորդ տուրում գրավելով ԲԿՄԱ-ի դարպասը՝ «Արարատի» պաշտպան Մարկո Պրլևիչը դարձել էր VBET ՀՊԼ-ում թիմի կազմում գոլ խփած ամենատարեց լեգեոնականը (33 տարեկան 291 օրական): «Փյունիկի» հետ կայացած խաղում սերբ ֆուտբոլիստը մեկ այլ ուշագրավ ցուցանիշ գրանցեց:

VBET ՀՊԼ-ում Պրլևիչը 114-րդ խաղն անցկացրեց և դարձավ Հայաստանի առաջնություններում հանդես եկած ամենափորձառու սերբ  ֆուտբոլիստը: Նա մեկ խաղով գերազանցեց իր հայրենակից, հայկական 4 ակումբներում հանդես եկած Գորան Օբրադովիչի ռեկորդային ցուցանիշը:

Մարկո Պրլևիչը Հայաստանում հայտնվեց 2016թ. ամռանը՝ բոսնիական «Բորացից» տեղափոխվելով Գյումրիի «Շիրակ»: Հետաքրքիր է, որ ՀՀ առաջնություններում նա նորամուտը նշել է հենց «Արարատի» հետ 2016թ. հոկտեմբերի 1-ին Երևանում կայացած խաղում: Իսկ պաշտոնական մրցումներում Պրլևիչն առաջին անգամ «Շիրակի» մարզաշապիկը կրել է 2016թ. սեպտեմբերի 22-ին «Կոտայքի» հետ կայացած ՀՀ գավաթի քառորդ եզրափակիչ խաղում:

Սերբ բարձրահասակ պաշտպանը հենց նորամուտի խաղից իր մշտական տեղն ապահովեց գյումրեցիների մեկնարկային կազմում՝ դառնալով թիմի պաշտպանության հենասյուներից մեկը: 2016/17թթ. առաջնությունում նա մասնակցեց 19 խաղի ու դարձավ մեկ գոլի հեղինակ: Հետաքրքիր է, որ այդ գոլն էլ Պրլևիչը խփել էր «Արարատի» դարպասը 2017թ. մայիսի 20-ին կայացած խաղում՝ դառնալով «Շիրակում» գոլ խփած ամենատարեց լեգեոնականը:

«Շիրակում» անցկացրած առաջին մրցաշրջանը շատ հաջող դասավորվեց Պրլևիչի համար, որը դարձավ Հայաստանի գավաթակիր և առաջնության բրոնզե մեդալակիր:
Առաջնության ավարտից հետո Պրլևիչը հեռացավ «Շիրակից»՝ տեղափոխվելով սերբական «Պրոլետեր», սակայն ձմռանը կրկին վերադարձավ «Շիրակ», որի կազմում 2017/18թթ. առաջնության գարնանային հատվածում անցկացրեց 13 խաղ ու կրկին միակ գոլը խփեց «Արարատի» դարպասը:

Եվ կրկին առաջնության ավարտից հետո Պրլևիչը որոշ ժամանակով բացակայեց «Շիրակից»՝ հանդես գալով բուլղարական «Ցարսկո սելո» թիմում: 2019թ. գարնանը նա կրկին հագավ «Շիրակի» մարզաշապիկը՝ մասնակցելով առաջնության 15 խաղի:

2019/20թթ. առաջնությունն առաջինն էր, որում սերբ ֆուտբոլիստը ողջ մրցաշրջանն անցկացրեց «Շիրակում»՝ մասնակցելով 25 խաղի: Հաջորդ մրցաշրջանում Վարդան Բիչախչյանը «Շիրակի» մի խումբ ֆուտբոլիստների թվում իր հետ «Արարատ» բերեց նաև Մարկո Պրլևիչին, որը նոր թիմակիցների հետ Հայաստանում իր երկրորդ տիտղոսը նվաճեց՝ դառնալով կրկնակի գավաթակիր:

VNews.am-ը ներկայացնում է ՀՀ առաջնություններում առավել շատ խաղեր անցկացրած սերբ ֆուտբոլիստների տասնյակը: