Tesla էլեկտրամոբիլների արտադրողի ղեկավար Իլոն Մասկը միկրոէլեկտրոնային չիպերի պակասությունը համեմատել է համաճարակի ընթացքում զուգարանի թղթի պակասի հետ և հույս հայտնել, որ խնդիրը կարճաժամկետ է:
«Մեր ամենամեծ խնդիրը մատակարարման շղթան է, հատկապես միկրոկոնտրոլերի չիպերը, ես նման բան դեռ չեմ տեսել: Դեֆիցիտի վախը ստիպում է յուրաքանչյուր ընկերության չափազանց շատ չիպ պատվիրել: Դա նման է զուգարանի թղթի պակասի, բայց էպիկական մասշտաբի», – գրել է Մասկը` պատասխանելով Twitter-ի օգտատիրոջ հաղորդագրությանը:
Հավանաբար, գործարարը խոսում էր 2020-ին կորոնավիրուսային համաճարակի սկզբում նկատվող իրավիճակի մասին, երբ կտրուկ աճել էր տարբեր ապրանքների պահանջարկը՝ ներառյալ հացահատիկների, պահածոների և զուգարանի թղթի:
Այնուամենայնիվ, Tesla-ի ղեկավարը կարծում է, որ չիպերի պակասի հետ կապված խնդիրը կարճաժամկետ է:
Մայիսի վերջին Financial Times-ը գրել էր, որ Tesla-ն քննարկում է կիսահաղորդչային կայան ձեռք բերելու հնարավորությունը և պատրաստվում է նաև կանխավճար թողնել չիպերի մատակարարման համար:
