ՊՍԺ-ի ֆրանսիացի հարձակվող Կիլիան Մբապեն ցանկանում է մարզական կարիերան շարունակել Մադրիդի «Ռեալում»՝ հաղորդում է AS-ը:
Կիլիանն ակնկալում է Մադրիդի «Ռեալի» գործուն քայլերը: Ֆրանսիացին հույս ունի, որ «Ռեալը» ճնշում կգործադրի ՊՍԺ-ի վրա ու տրանսֆերի հարցում կհասնի ցանկալի արդյունքի:
Հիշեցնենք՝ Կիլիան Մբապեն ՊՍԺ-ում է հանդես գալիս 2017 թվականից: Մինչև այդ նա պաշտպանում էր «Մոնակոյի» գույները:
2020-21 մրցաշրջանում Մբապեն ընդհանուր անցկացրել է 47 խաղ՝ դառնալով 42 գոլի և 11 գոլային փոխանցման հեղինակ: ԵՎՐՈ 2020-ում Մբապեն Ֆրանսիայի հավաքականի հետ հասավ մինչև 1/8 եզրափակիչ, որտեղ պայքարից դուրս մնաց՝ պարտվելով Շվեյցարիայի ընտրանուն:
Ավելի վաղ հայտնի է դարձել, որ ՊՍԺ-ն պատրաստ է Մբապեին առաջարկել այնպիսի պայմանագիր, որ ֆրանսիացին վաստակի այնքան, որքան Նեյմարը: Ոչ պաշտոնական տվյալներով՝ Նեյմարի զուտ աշխատավարձի չափը ՊՍԺ-ում կազմում է տարեկան 30 մլն եվրո(առանց հավելավճարների):