Իսպանիայի առաջնության 28-րդ տուրում «Բարսելոնայի» հարձակվող Լիոնել Մեսին մասնակցել է «Ռեալ Սոսյեդադի» դեմ արտագնա հաղթանակին (6:1), որում նա դուբլի հեղինակ է դարձել և մեկ գոլային փոխանցում է կատարել:
Արգենտինացու համար այդ խաղը 768-րդն էր կատալոնական թիմի կազմում: Նա դարձավ ակումբի պատմության ամենաշատ հանդիպումներ անցկացրած ֆուտբոլիստը: Նախորդ տուրից հետո 33-ամյա ֆուտբոլիստը ռեկորդը կիսում էր «բլաուգրանայի» լեգենդ Չավիի հետ (767):
«Գագաթում՝ միայնակ: Ֆուտբոլիստ այլ աշխարհից: Տիեզերական նվաճում»,- գրել է «կապտանռնագույնների» թվիթերյան էջը:
Արգենտինացին նաև «բլաուգրանայի» պատմության լավագույն ռմբարկուն է: Նա ակումբի կազմում 663 գոլ է խփել ու 264 գոլային փոխանցում կատարել
Մեսին «Բարսելոնա» է տեղափոխվել 2000 թվականին՝ 13 տարեկան հասակում: 2004 թվականին նա նորամուտն է նշել գլխավոր թիմում:
