Մադրիդի «Ռեալի» խորվաթ կիսապաշտպան Լուկա Մոդրիչը հայտարարել է, որ մտադիր է երկարաձգել պայմանագիրն «Արքայական ակումբի» հետ՝ հայտնում է լրագրող Ֆաբրիցիո Ռոմանոն։
«Ես դեռ չեմ երկարաձգել պայմանագիրս «Ռեալի» հետ, բայց չեմ վարվի այնպես, ինչպես Մբապեն։ Եվ ես ակնկալում եմ, որ ակումբն էլ ինձ հետ նման կերպ չի վարվի»,- Ռոմանոյի հաղորդմամբ՝ ասել է Լուկան:
Հիշեցնենք՝ Մադրիդի «Ռեալը» դեռևս նախորդ ամռանն էր ցանկանում ձեռք բերել Մբապեին, սակայն ֆրանսիական ակումբը երիտասարդ գոլահարին բաց չթողեց: Ակնկալվում էր, որ Կիլիանը նոր պայմանագիր չի կնքի ՊՍԺ-ի հետ ու կտեղափոխվի մադրիդյան գրանդ: Հարձակվողը, սակայն, երեք տարվա նոր պայմանագիր կնքեց ներկայիս թիմի հետ:
36-ամյա Մոդրիչի՝ «Ռեալի» հետ գործող պայմանագրի ժամկետն ավարտվելու է հունիսին: Լուկան Լա լիգայի ավարտված մրցաշրջանում մասնակցել է 28 հանդիպման, խփել 2 գոլ և կատարել 8 գոլային փոխանցում:
