«Ռոմայի» գլխավոր մարզիչ Ժոզե Մոուրինյոն պնդում է, որ հռոմեական ակումբի ղեկավարությունը պայմանագիր կնքի Թուրինի «Յուվենտուսի» արգենտինացի հարձակվող Պաուլո Դիբալայի հետ՝ հայտնում է Calciomercato-ն։
«Դու հիանալի ֆուտբոլիստ ես, և ես կցանկանայի մարզել քեզ նման խաղացողի»,- աղբյուրի հաղորդմամբ՝ պորտուգալացի մասնագետն ասել է Դիբալային: Հաղորդվում է, որ Պաուլոն տպավորված է հռոմեական թիմի ելույթներով և դիտարկում է Ժոզեի առաջարկը:
Արգենտինացի հարձակվողը հունիսին կդառնա ազատ գործակալ, եթե չերկարաձգի «Յուվենտուսի» հետ գործող պայմանագրի ժամկետը: Ավելի վաղ հաղորդվում էր, որ Դիբալան պայմանագիր է համաձայնեցրել Միլանի «Ինտերի» հետ: Այս մրցաշրջանում ֆուտբոլիստն Ա Սերիայում անցկացրել է 27 հանդիպում, դարձել 10 գոլի և 5 գոլային փոխանցման հեղինակ։