«Ռոմայի» պորտուգալացի գլխավոր մարզիչ Ժոզե Մոուրինյոն «Ֆեյենորդի» դեմ Կոնֆերենցիաների լիգայի եզրափակիչից առաջ կայացած նախախաղային ասուլիսի ընթացքում հաստատել է, որ թիմի հայ կիսապաշտպան Հենրիխ Մխիթարյանը պատրաստ է այսօրվա հանդիպմանը:
«Հենրիխն առաջին մարզումն անցկացրեց ընդհանուր խմբի հետ Տրիգորիայում: Բավական անիմաստ մարզում էր, քանի որ բաց էր լրատվամիջոցների ներկայացուցիչների համար:
Բայց այդ մարզումը կարևոր էր նրա համար, ես վստահում եմ Մխիթարյանի փորձին: Նա ավելի լավ գիտի իր մարմինը: Մարզման ավարտին ինձ ասաց, որ պատրաստ է»,- Մոուրինյոյի խոսքն է մեջբերում Football Italia-ն:
33-ամյա հայ կիսապաշտպանը մոտ 1 ամիս բացակայել է խաղադաշտից աջ ազդրի մկանային վնասվածքի պատճառով: Նշենք՝ «գայլերը» նախախաղային մարզումն անցկացրել են Հռոմում, իսկ Տիրանայում ընդամենը ծանոթացել են «Էյր Ալբանիայի» խոտածածկին, որտեղից VNews-ը բացառիկ տեսանյութ է ներկայացրել:
ՈՒԵՖԱ-ի Կոնֆերենցիաների լիգայի անդրանիկ խաղարկության եզրափակիչը կկայանա այսօր Ալբանիայի մայրաքաղաք Տիրանայում՝ «Էյր Ալբանիա» մարզադաշտում: Հանդիպումը 23:00-ից կարող եք դիտել «Վիվառո Սպորտ»-ի ուղիղ եթերում: