«ԱԼԱՇԿԵՐՏ» – «ԱՐԱՐԱՏ»
15 մայիսի, ժ.19:00, Երևան, «Հանրապետական» մարզադաշտ
4 խաղ, որոնցում հաղթել է «Ալաշկերտը», խփած և բաց թողած գոլերի հարաբերակցությունը՝ 11-3
Հետաքրքիր 10 փաստ՝ հանդիպմանն ընդառաջ
1․ Սա մրցակիցների գավաթային 3-րդ դիմակայությունն է և առաջինը՝ պատվավոր մրցանակի եզրափակիչում: «Արարատի» և «Ալաշկերտի» գավաթային ճանապարհներն առաջին անգամ հատվել են 2014/15թթ. խաղարկության քառորդ եզրափակիչում: 2014թ. սեպտեմբերի 17-ին կայացած առաջին խաղում «Ալաշկերտը» հյուրընկալվելիս հաղթել էր Նորայր Գյոզալյանի և Գոռ Մալաքյանի խփած գոլերի շնորհիվ:
Հոկտեմբերի 22-ին կայացած պատասխան խաղն աչքի ընկավ գոլերի առատությամբ: «Ալաշկերտը» սեփական հարկի տակ հաղթեց 4-3 հաշվով: Ալաշկերտցիներից դուբլի հեղինակ դարձավ Վահագն Մինասյանը, մեկական գոլ խփեցին Միհրան Մանասյանն ու Արսեն Բալաբեկյանը: «Արարատից» դուբլ ձևակերպեց Ռոբին դի Լաուրոն, մեկ գոլ էլ խփեց Բրայան դե Լա Ֆուենտեն: Հետաքրքիր է, որ «Ալաշկերտի» ներկայիս կազմից այդ հանդիպումներին մասնակցել է միայն Միհրան Մանասյանը, արարատցիներից Էդգար Մալաքյանը պատասխան խաղում փոխարինման էր մտել «Ալաշկերտի» կազմում:
Գավաթի հաջորդ խաղարկությունում մրցակիցները կրկին հանդիպեցին քառորդ եզրափակիչում: 2015թ. հոկտեմբերի 28-ին կայացած առաջին խաղի ելքը վճռել էր Միհրան Մանասյանի խփած միակ գոլը: Նոյեմբերի 25-ին կայացած պատասխան խաղում «Ալաշկերտը» հյուրընկալվելիս 4 անպատասխան գնդակ էր ուղարկել մրցակցի դարպասը: Դուբլի հեղինակ էր դարձել Հեբեր Արաուխոն, մեկական անգամ էլ աչքի էին ընկել Միհրան Մանասյանն ու Արսեն Բալաբեկյանը: Բացի Մանասյանից, «Ալաշկերտի» ներկայիս կազմից հանդիպումներին մասնակցել էր նաև Գևորգ Կասպարովը: Իսկ ներկայիս արարատցիներից Կարեն Մուրադյանն ու Արտակ Եդիգարյանն այդ խաղերին մասնակցել են «Ալաշկերտի» մարզաշապիկով:
2․ «Ալաշկերտը» գավաթի ընթացիկ մրցաշարում անպարտելի է: Առաջին երկու փուլերում ալաշկերտցիները դիմակայության երկու հանդիպումներում էլ հաղթել են «Շիրակին» (2-1, 1-0) և ԲԿՄԱ-ին (4-0, 2-1), իսկ կիսաեզրափակիչում՝ առավելության են հասել «Նոայի» նկատմամբ (1-1, 3-1):
Ժամանակը եկել է. Ինչու է «Արարատը» հաղթելու VBET Հայաստանի գավաթի եզրափակիչում
Գավաթի մրցաշարում խփած 13 գոլերից 4-ի հեղինակն Ալեքսանդր Գլիշիչն է, որն ընթացիկ խաղարկության լավագույն ռմբարկուներից մեկն է: 2 գոլի հեղինակ է դարձել Դավիդ Դավիդյանը, մեկական անգամ աչքի են ընկել Բրայան Սիլվա Գարսիան, Պապե Աբդու Կամարան, Նիկիտա Տանկովը, Գագիկ Դաղբաշյանը, Վանգու Գոմեն, Սանդի Ինուսա Ումարուն և Ռումյան Հովսեփյանը:
3․ «Արարատը» գավաթի ընթացիկ խաղարկության առաջին երկու փուլերում մրցել է Առաջին խմբի ներկայացուցիչների հետ: Եթե 1/8 եզրափակիչում արարատցիները հեշտությամբ լուծեցին հաջորդ փուլ դուրս գալու խնդիրը՝ երկու խաղերում էլ հաղթելով «Սևանին» (3-0, 3-1), ապա քառորդ եզրափակիչում քիչ ջանքեր չներդրեցին «Վեստ Արմենիայի» արգելքը հաղթահարելու համար (0-2, 5-1): Կիսաեզրափակիչում էլ արարատցիները երկու խաղերի ընդհանուր արդյունքով առավելության հասան «Արարատ-Արմենիայի» նկատմամբ (2-0, 1-2):
Գավաթի ընթացիկ խաղարկությունում անցկացրած 6 հանդիպումներում արարատցիները 14 գոլ են խփել: Առավել արդյունավետ է գործել Մորի Կոնեն, որը 4 գնդակով գավաթի ընթացիկ խաղարկության լավագույն ռմբարկուներից մեկն է: 2-ական գոլ են խփել Էդգար Մալաքյանը, Մարկո Պրլևիչը, Ուրոշ Նենադովիչն ու Դավիթ Խուրցիձեն, մեկական անգամ էլ աչքի են ընկել Դիմիտրիե Պոբուլիչն ու Զավեն Բադոյանը:
4․ «Ալաշկերտի» համար սա գավաթի 3-րդ եզրափակիչն է, այն էլ վերջին 4 խաղարկություններում: 2017/18թթ. մրցաշարում գավաթը նվաճելու «Ալաշկերտի» առաջին փորձն անհաջող էր: Ալաշկերտցիները հետխաղյա 11մ հարվածաշարում 3-4 հաշվով զիջեցին «Գանձասար-Կապանին» (հիմնական և լրացուցիչ ժամանակից հետո հաշիվը 1-1 էր):
«Հարց լուծող մարզիչը». 3 պատճառ՝ ինչու VBET Հայաստանի գավաթում կհաղթի «Ալաշկերտը»
Իսկ ահա հաջորդ խաղարկությունում «Ալաշկերտը» նվաճեց ՀՀ գավաթը՝ եզրափակիչում նվազագույն հաշվով հաղթելով «Լոռիին»:
5․ «Արարատը» 8-րդ անգամ է եզրափակիչում վիճարկելու VBET Հայաստանի գավաթը: Պատվավոր մրցանակը նվաճելու նախորդ 7 փորձերից 5-ը պսակվել են հաջողությամբ: Ընդ որում, առաջին 4 նվաճումներն արարատցիները գրանցել են 20-րդ դարում՝ այդ ցուցանիշով դառնալով յուրօրինակ ռեկորդակիրներ: «Արարատն» առաջինն էր, որին հաջողվեց 3 տարի շարունակ (1993թ.՝ «Շիրակ»՝ 3-1, 1994թ.՝ «Շիրակ»՝ 1-0, 1995թ.՝ «Կոտայք»՝ 4-2) նվաճել ՀՀ գավաթը (հետագայում նման ցուցանիշի է հասել միայն «Փյունիկը» 2013-2015թթ.): Ի դեպ, 1994թ. եզրափակիչում «Արարատին» հաղթանակ էր պարգևել ներկայումս «Ալաշկերտի» մարզչական շտաբում ընդգրկված Կարեն Բարսեղյանի խփած միակ գոլը: Իսկ 1995թ. եզրափակիչում Բարսեղյանն արդեն «Կոտայքի» կազմում 2 անգամ գրավել էր «Արարատի» դարպասը՝ դիպուկ իրացնելով 11մ հարվածները:
1997թ. «Արարատը» դարձավ քառակի գավաթակիր՝ վճռորոշ խաղում նվազագույն հաշվով պարտության մատնելով «Փյունիկին»: Իսկ առայժմ վերջին հաջողությանն արարատցիները հասել են 2008թ.՝ Վարուժան Սուքիասյանի գլխավորությամբ եզրափակիչում լրացուցիչ ժամանակում 2-1 հաշվով հաղթելով «Բանանցին»:
Իսկ ահա 21-րդ դարում անցկացրած մյուս երկու եզրափակիչ հանդիպումներում արարատցիները պարտվել են (2001թ.՝ «Միկա»՝ 1-1, 3-4՝ 11մ, 2007թ.՝ «Բանանց»՝ 1-3):
