(Նախա)վերջին շանսը. ինչի շնորհիվ Մեսին կարող է իր առաջին մեծ տիտղոսը նվաճել Արգենտինայի հավաքականի հետ

Խաղի մանրամասները

Հարավային Ամերիկա, Ամերիկայի գավաթ, Փլեյ-օֆֆ

11 Հուլիս 2021 - 04:00

Արգենտինա

Բրազիլիա

1 - 0 Անխել Դի Մարիա - 22`

«Բարսելոնայի» կազմում 34 տիտղոս ու Արգենտինայի հավաքականի հետ օլիմպիական ոսկե մեդալ նվաճելուց հետո բոլորն են ասում, որ Լիոնել Մեսին հաղթել է հնարավոր ամեն ինչ ֆուտբոլում: Վերջին 15 տարիներին Լեոն գլխավերևում բարձրացնում է Չեմպիոնների լիգայի գավաթը կամ դառնում Իսպանիայի չեմպիոն, ազգային հավաքականում էլ անցկացրած 150 խաղում 76 գոլ է խփել: 6 «Ոսկե գնդակի» մասին էլ չխոսենք (չնայած՝ արդեն խոսեցինք 🙂 ):

Թվում է՝ Մեսին այլևս ոչ մի մոտիվացիա չունի ֆուտբոլ խաղալու համար: Բայց կա մի բան, որ կանգնել է արգենտինացու կոկորդին. Մեսին ոչ մի մեծ միջազգային տիտղոս չի նվաճել կարիերայում: Այս առումով Մեսիի կարիերայում միայն ձախողումներ են. Ամերիկայի գավաթի 3 եզրափակիչ, ԱԱ 1 եզրափակիչ, անփառունակ պարտություններ ու ոչ մի չեմպիոնություն: Այժմ Արգենտինայի հավաքականը կրկին դուրս է եկել եզրափակիչ:

Վերհիշենք Մեսիի նախորդ մեծ մրցաշարերն ու հասկանանք՝ կարո՞ղ է ֆուտբոլի պատմության մեծագույններից մեկն օգնել իր թիմին վերջ դնել 28 տարվա տիտղոսային երաշտին:

Ամերիկայի գավաթ 2007. կիսաքաղցր սկիզբը

Մեսիի առաջին մեծ պարտությունը 2007-ին էր՝ «Բարսելոնայի» հիմնական թիմում հաստատվելուց ընդամենը մեկ տարի անց: Չնայած՝ թիմի առաջատար Խուան Ռոման Ռիկելմեի ներկայությանն ու Մեսիի անփորձ լինելուն, թիմի գլխավոր մարզիչ Ալֆիո Բազիլեն չվախեցավ Մեսիին շանս տալ և չսխալվեց: Խոստումնալից երիտասարդը, որ մրցաշարի ժամանակ նշեց իր 20-ամյակը, հայտնվեց Կոլումբիայի դեմ առաջին խաղի մեկնարկային կազմում, ԱՄՆ-ի դեմ երկրորդ խաղում արդեն գոլային փոխանցում կատարեց Էրնան Կրեսպոյին, Արգենտինան էլ հաղթեց խմբային փուլի բոլոր խաղերում:

1/4 եզրափակիչի Պերուի դեմ խաղում Մեսին բացեց իր գոլերի հաշիվը Ամերիկայի գավաթում, բայց այդ գոլի մասին բոլորը մոռացան, երբ կիսաեզրափակիչում՝ Մեքսիկայի ընտրանու դեմ խաղում Մեսին ֆանտաստիկ հարվածով խփեց իր երկրորդ գնդակը:

This Lionel Messi goal in a Copa America semi-final isn’t talked about enough. pic.twitter.com/M6oEyzx4Xn
— SR (@TotalMaestro) June 28, 2021

Հրաշալի ընթացք ունեցող մրցաշարը, սակայն, անփառունակ ավարտ ունեցավ Մեսիի ու խաղընկերների համար: Բրազիլիայի հավաքականը 3 անպատասխան գնդակ ուղարկեց արգենտինացիների դարպասն ու վստահ հաղթանակ տարավ եզրափակիչում:

ԱԱ 2010. տխրահռչակ ջաբուլանին ու գերմանական ապտակը

Մեսիի հաջորդ մեծ մրցաշարը 2010-ին էր, բայց նա այդ 3 տարիների ընթացքում հասցրել էր խոստումնալից երիտասարդից դառնալ լավագույն ֆուտբոլիստն աշխարհում, բայց այդ ֆանտաստիկ մարզավիճակը նա Արգենտինայի հավաքական բերել չկարողացավ:

ՀԱՀ-ում կայացած մրցաշարը վատագույններից է Մեսիի կարիերայում: Նա ոչ մի գոլի հեղինակ չդարձավ այդ մրցաշարում, ինչպես շատ աստղեր այդ տարի, որոնք դժգոհում էին ջաբուլանի կոչվող գնդակից: Շատերն ասում էին, որ այդ գնդակն ունի տարօրինակ հետագիծ ու անսովոր է խաղալ այդ գնդակով:

Արգենտինայի հավաքականի ու Մեսիի ձախողումը միայն գնդակի վրա բարդելը, իհարկե, ճիշտ չէ: 1/4 եզրափակիչում Գերմանիայի հավաքականն այնպիսի խաղային/գոլային ապտակ հասցրեց՝ հաղթելով 4-0 հաշվով, որը դառնությամբ է հիշում Մեսին, իսկ Դիեգո Մարադոնայի մարզչական կարճատև կարիերան ավարտվեց հավաքականում:

Ամերիկայի գավաթ 2011. շքեղ հարձակում, թույլ թիմ

Արգենտինայի հավաքականը միշտ էլ աչքի է ընկել թոփ հարձակվողներով, որոնք հիասքանչ են խաղում եվրոպական լավագույն ակումբներում: Բայց միշտ չէ, որ ստացվել է նրանցից լավ կոլեկտիվ ստանալ:

2011-ի Ամերիկայի գավաթի խաղարկությունն այդ դեպքերից էր: Գոնսալո Հիգուայինը շատ արդյունավետ էր «Ռեալում», Սերխիո Ագուերոն՝ «Ատլետիկոյում», Մեսին էլ իր կարիերայի լավագույն էտապն էր անցկացնում ու մրցաշարին ներկայացել էր ՉԼ եզրափակիչում «Մանչեսթեր Յունայթեդի» դեմ փառահեղ տրիումֆից հետո: Բայց Արգենտինայի հավաքականը կրկին ձախողվեց. կրկին անատամ ու ոչ կոմբինացիոն խաղ, կրկին տապալում ամենակարևոր պահին: Արգենտինայի այդ հավաքականը եզրափակիչ էլ չհասավ՝ ճանապարհին պարտվելով Ուրուգվային, Մեսին էլ կրկին ոչ մի գոլ չխփեց:

Մեր ընտրանին

ԱԱ 2014. երազանքին մեկ քայլ էր մնում

Արգենտինայի հավաքականն ավելի զորեղ կազմով ներկայացավ աշխարհի 2014 թվականի առաջնությանը, մրցաշարի կենտրոնական դեմքերից էլ դարձավ Մեսին:

Խմբային փուլում արգենտինացին առաջնորդեց իր թիմին՝ հաղթանակ պարգևելով Բոսնիայի և Հերցեգովինայի, Նիգերիայի ու Իրանի դեմ խաղերում՝ դառնալով 4 (մեկը մյուսից գեղեցիկ) գոլի հեղինակ: 1/8 եզրափակիչում Մեսին գոլ չխփեց, բայց Շվեյցարիայի դեմ հանդիպման արդեն լրացուցիչ ժամանակում հենց նրա փոխանցումից հետո Անխել դի Մարիան խփեց հաղթական գնդակը:

Բելգիայի և Նիդերլանդների ընտրանիների արգելքը հաղթահարելուց հետո Արգենտինան դուրս եկավ եզրափակիչ, որտեղ մրցակիցն ահեղ Գերմանիան էր՝ Բրազիլիային 7-1 հաշվով «լողացնելուց» հետո: «Մարականայում» կայացած եզրափակիչում գերմանացիներն ամենևին էլ չունեին խաղային այն առավելությունը, որ նրանց թույլ էր տալիս հաղթել բոլորին: Արգենտինայի հավաքականն ունեցավ գոլային շատ իրական պահեր. առաջինը շատ նպաստավոր դիրքից վրիպեց Հիգուայինը, իսկ երկրորդ խաղակեսում՝ Ռոդրիգո Պալասիոն: Իր պահն ունեցավ նաև Մեսին, երբ սուր անկյունից կատարած հարվածից հետո գնդակը շրջանցեց Նոյերին, բայց նաև հեռավոր դարպասաձողն ու միլիմետրերի տարբերությամբ դուրս եկավ դիմային գծից:

Հանդիպումը տեղափոխվեց լրացուցիչ ժամանակ, որտեղ Մարիո Գյոտցեն խփեց հաղթական գոլը՝ կոտրելով արգենտինացիների և Մեսիի սիրտը: Այդուհանդերձ՝ Մեսիի մեծ աշխատանքն ամբողջ մրցաշարում բարձր գնահատվեց և նա ճանաչվեց առաջնության լավագույն ֆուտբոլիստ՝ թեև դա չէր, որին նա ձգտում էր. «Ես իմ բոլոր անհատական ռեկորդները կտայի, միայն թե դառնայի աշխարհի չեմպիոն: Ես կցանկանայի աշխարհի գավաթը բարձրացնել՝ «Ոսկե գնդակի» փոխարեն: Դա իմ մանկության երազանքն էր ու կարծում եմ՝ ֆուտբոլիստի համար ամենամեծ նվաճումն այս սպորտում», – հայտարարեց Մեսին խաղից հետո:

Ամերիկայի գավաթ 2015. Հիգուայինը կրկին փչացրեց ամեն ինչ

Մեսին չգիտեր, որ իր հիասթափությունները դեռ նոր էին սկսում:

2015-ին՝ հաջորդ տարի Ամերիկայի գավաթի խաղարկությանը Մեսին կրկին մոտեցավ բարձր տրամադրությամբ՝ «Բարսելոնայի» հետ տրեբլ նվաճելուց հետո: Բայց հավաքականում Լեոն կրկին այլ տեսք ուներ: Նա միայն մեկ գոլ խփեց ու 3 ասիստ կատարեց՝ թեև Արգենտինայի հավաքականը հասավ մինչև եզրափակիչ՝ կիսաեզրափակիչում էլ 6-1 հաշվով Պարագվայի ընտրանուն հաղթելուց հետո:

Եզրափակիչում մրցակիցը Չիլին էր: Հանդիպումն ավարտվեց ոչ-ոքի, լրացուցիչ ժամանակում էլ ոչինչ չորոշվեց, գործն անցավ 11-մետրանոց հարվածաշարի: Մեսին իր թիմի միակ ֆուտբոլիստն էր, որ անվրեպ իրացրեց հարվածը, մինչդեռ Հիգուայինը Մ̶ե̶ս̶ի̶ի̶ ̶ե̶ր̶ա̶զ̶ա̶ն̶ք̶ը̶ գնդակն ուղարկեց երկինք:

Ամերիկայի գավաթ 2016. երրորդ անընդմեջ ֆիասկոն

Մեկ տարի անց (անհասկանալի է՝ ով և ինչու է մտածել այս ձևաչափը) Ամերիկայի գավաթի խաղարկությունն էր:

2016-ի սցենարն ամեն ինչով նույնն էր, ինչ 2015-ին. կրկին եզրափակիչ դուրս եկան Արգենտինայի ու Չիլիի հավաքականները, միայն թե այս անգամ Մեսին ավելի լավ մրցաշար էր անցկացրել՝ խփելով 5 գոլ (Պարագվայի դեմ խաղում հեթ-տրիկ), ընդ որում՝ մեկական գոլ էր խփել 1/4-ում և կիսաեզրափակիչում ու կատարել էր 5 գոլային փոխանցում:

Բայց նորից Չիլին ու նորից նույն պատկերը: Արգենտինայի ամենաիրական պահը կրկին ունեցավ Հիգուայինը (ա՜խ այդ Հիգուայինը), որը կրկին փչացրեց՝ շեղ հարվածելով նպաստավոր դիրքից: Հետխաղյա 11-մետրանոց հարվածաշարում այս անգամ արդեն վրիպեց Մեսին, Արգենտինան էլ պարտվեց: Մեսին այդ տապալումն այնքան ծանր տարավ, որ հայտարարեց միջազգային կարիերան ավարտելու մասին: Որոշ ժամանակ անց, իհարկե, սառը գլխով Մեսին հասկացավ, որ դեռ վաղ է ու պետք է պայքարել միջազգային տիտղոս նվաճելու համար:

ԱԱ 2018. Արգենտինայի ճանապարհին հայտնվեց Մբապեն

2018-ի Մունդիալին Արգենտինայի այդ աստղային, բայց ձախողակ սերունդը սպառման նշաններ ցույց տվեց: Թիմն արդեն չէր էլ կարողանում լավ խաղալ, առանցքային ֆուտբոլիստները տարեց էին, ու Արգենտինան կրկին միայն Մեսին էր:

Խմբային փուլում նրանք չկարողացան հաղթել Իսլանդիային, 0-3 հաշվով պարտվեցին Խորվաթիայի ընտրանուն ու միայն երրորդ տուրում Նիգերիային հաղթելուց հետո խուսափեցին խայտառակությունից: 1/8 եզրափակիչում մրցակիցը Ֆրանսիան էր՝ ապագա աշխարհի չեմպիոնը, որի դեմ Արգենտինան կարողացավ դիմադրություն ցույց տալ միայն դրվագներով: Երկրորդ կեսում, երբ արգենտինացիներն առաջ անցան հաշվի մեջ, հայտնվեց Կիլիան Մբապեն ու անջատեց նրանց՝ անցկացնելով Ֆրանսիայի հավաքականում իր լավագույն խաղերից մեկը:

Մեսին այս մրցաշարում միայնակ ոչինչ անել չէր կարող:

Ամերիկայի գավաթ 2021. Մեսիի (նախա)վերջին շանսը

Մեսիի համար Ամերիկայի գավաթի այս խաղարկությունը միջազգային տիտղոս նվաճելու, թերևս, նախավերջին շանսն է՝ Մունդիալ 2022-ից առաջ:

Շատերն ասում են, որ սա Արգենտինայի հավաքականում խաղացող լավագույն Մեսին է: Այս խոսքերը փաստում են որոշ գործոններ, առաջին հերթին՝ թվերը: Ամերիկայի գավաթի այս խաղարկությունում Մեսին պարզապես փայլում է. 5 գոլային փոխանցում ու 4 գոլ, 4 խաղերում էլ նա ճանաչվել է խաղի լավագույն ֆուտբոլիստ: Կա մեկ այլ գործոն՝ Մեսիի անսահման մոտիվացիան: Մեսին խաղերին մոտենում է բացառիկ նվիրվածությամբ, նա այլևս հուսահատության ժեստեր չի անում խաղերի ժամանակ, ինչպես նախկինում ու փորձում առաջնորդել երիտասարդներին:

Տարօրինակ է հնչում, բայց Մեսիի օգտին է աշխատում նաև այն հանգամանքը, որ մարզադաշտերը դատարկ են (կորոնավիրուսի իրավիճակը Հարավային Ամերիկայում մեծ տարածում ունի), խաղերից հետո չկան հարցազրույցներ: Մեսին չի զգա իր վրա մարդկային ճնշումը, նա կկենտրոնանա իր երկու գործառույթների վրա. լինել ավագ ու առաջնորդել թիմին խաղադաշտից դուրս, և, բնականաբար, անել իր գործը խաղադաշտում: Արգենտինայի հավաքականն էլ այժմ անցումային փուլում է, կան մի շարք երիտասարդներ, որոնք հաղթանակի քաղց ունեն և ամեն ինչ անելու են Մեսիի 5-րդ եզրափակիչը հաղթական դարձնելու համար:

Մրցակիցն ամենևին էլ հեշտ չէ. Բրազիլիայի հավաքականը կազմով ու խաղային բազմազանությամբ շատ ավելի ուժեղ է, բայց Մեսին իր առջև հստակ խնդիր է դրել՝ կամ հիմա, կամ երբեք: Արգենտինացին ամեն ինչ անելու է իր պատմությունը գրելու, հավաքականում հավերժանալու և Մարադոնայի ստվերից դուրս գալու համար: